如风往事之——再话“轧闹猛”（上海方言文章）

如风往事之——再话“轧闹猛”（上海方言文章）

        “轧闹猛”是一句方言土语，其读音为“gah nho man”，迭三个字属于“吴语语系词汇”，通用于北部吴语地区，如：常州话、无锡话、苏州话、上海话、湖州话、杭州话、嘉兴话……等地区都会得使用迭个词语，不过，使用频率最多额，恐怕还是要数上海人了！

如风往事之——再话“轧闹猛”（上海方言文章）

        自1842年上海开埠以来，一直是狭气闹猛额，还被西方人称之为“东方的夜巴黎”，“上海国际饭店”勒辣20世纪30年代有“远东第一高楼”之称，层高24层，地下有得2层，地面以上额高度为83.8米……上海人使用“轧闹猛”迭额三个字眼，覅仅仅是包含着三层含义与意思，还有伊独有额表现形式及心里背景，比较耐人寻味。

如风往事之——再话“轧闹猛”（上海方言文章）

        第一层意思是讲：有一眼眼“瞎起哄”跟“起蓬头”额米道。

如风往事之——再话“轧闹猛”（上海方言文章）

        凡是看到啥地方人比较多，不管三七廿一，就欢喜往里厢钻、往里厢轧，生怕自己漏特了好额么事与事情。勒辣老底子国家还处在计划经济时期时，老百姓生活比较紧张与艰苦额辰光，几乎买啥额么事都要凭各类票证，而且还要去排队，各类队伍啊是排的老长额，只要有一额人勒辣抢紧俏物资与商品，后头额人眼扳数要紧跟（风），并引起一帮子人抢着排队，排成蛇行队伍。哪怕覅是购买紧俏物资与商品，只要是有人勒辣排着队，啊会得去排排队，要是一旦发现路子覅对，覅是自家要购买额么事，队伍中额人群就会得一轰而散各奔东西。

如风往事之——再话“轧闹猛”（上海方言文章）

        现在人民额生活水平啊大幅度提高了，各类商品与物资可以讲是琳琅满目名目繁多，让人挑花了眼，有些辰光还覅晓得买啥额么事好，就再啊覅需要急吼吼去排队轧啥额闹猛了，但不过上海人啊是有一眼贱骨头，覅闹猛、么得闹猛好去轧，反而觉得覅大好白相、一眼啊么米道与意思了，又滋生出一种新额闹猛，勒辣网络上会得不定期推出各种新额网红，如：网红蛋糕、网红奶茶、网红餐饮……是商家额一种促销手段，乃么上海人会得排队去购买伊拉额商品，就算要排一两额钟头、两三额钟头啊无所谓，认为只要米道好吃啊是值得额！

如风往事之——再话“轧闹猛”（上海方言文章）

        上述轧闹猛额例子倒是对个人、生活、家庭及社会么啥大额坏处，怕就怕有一种覅大好额轧闹猛，倒是会得带来极大额坏处，几乎能影响到方方面面，其中啊包括国家在内，可以讲是百害无一眼利益。 譬如讲：现在国家综合实力上去了，是世界第二大经济体，老百姓生活水平像芝麻开花一样节节高了，流行起一种披着“爱国主义”为外衣额排外情绪，只要自己国家受到别人家额国家欺负了，人人都要爱国家、都要为国家设想，要是有一额人覅是迭能去做，绝对是“一个标准汉奸与卖国贼”，动不动就要群起而攻之，大家一道来口诛笔伐，还要采用打砸抢烧手段，来纷纷去抵制各类国外生产额商品。据说，有覅少上海人会得起蓬头参与期间，带来了极其伐好额影响。

如风往事之——再话“轧闹猛”（上海方言文章）

        第二层意思是讲：上海人狭气欢喜闷声覅响额去“看白戏”。

如风往事之——再话“轧闹猛”（上海方言文章）

        啥额叫做“看白戏”，凡是覅用自家出铜钿看“各种各样戏”，一律叫做“看白戏”。“看白戏”含义有两种，一是指去看各类戏曲与曲艺，二是指去看闹猛地方滋出生来各类闹猛事体。有些人只要是看到有各类闹猛事体好轧、有各类白戏好看，自会得紧跟大家一道去，更会得里三层外三层包围着。不过，像迭能样子额人，一般是覅大会得主动去起蓬头。大人教育小囡额辰光，会得讲迭能一句闲话：“倷要拎拎清爽，脑子里还要多生一根筋，凡是人狭气多、狭气闹猛地方覅要去了，倷现在最主要任务是好好学习天天向上，每天要有一眼眼进步，覅该倷去管额闲事就覅要去管了，记牢了覅？！”……

如风往事之——再话“轧闹猛”（上海方言文章）

        之所以大人会得迭能来教育小囡，啊是老底子老祖宗传下来的经验与教训，认为：“管了闲事，反倒落不是”，覅管帮了啊里一方，总归有另外一方觉得覅大满意额地方，啊覅可能真正去做到一碗水都能端端平，反而要把别人家讲特一顿，还有可能成为猪头三，猪八戒照镜子里外不是人，与其覅落好犯不着，到覅如“多一事不如少一事”，耳朵根旁边啊好变得清净许多，更可以减少某些不必要额麻烦与烦恼，从对教育小囡闲话当中，充分体现了上海人世俗精明与门槛精了！

如风往事之——再话“轧闹猛”（上海方言文章）

        还有就是，对于一帮子欢喜看看白戏与闹猛额人来讲，覅大会得嫌事体大，干脆把事体弄弄大，事体越是弄了大越是好白相，一些看白戏与闹猛额人，啊会得觉得特别额扎劲有米道，大家啊好多了一份谈资与新闻，跟要好亲朋好友攀谈起来啊会得变得更加丰富多彩。

如风往事之——再话“轧闹猛”（上海方言文章）

        记得，笔者读初三下班学期额辰光，有一天夜到头放了夜学，辰光大约摸勒辣五点钟到五点半左右，勒辣马路浪厢，看到自家额亲阿哥下班以后么直接回去，而是跟了一帮子人一道看了一场白戏。有两三额人勒辣骂山门打相打，看额人是围了外三层里三层，随着骂山门打相打额人一道转动。虽然阿哥待在最最外面一层，但是伊额辰光吾覅晓得啥地方来额勇气，拿伊啊骂特了一顿，对伊讲：“骂山门打相打额人又覅管三七廿一咯，伊拉是瞎来来，倷万一把伊拉打伤特了哪能办啊？！”并劝伊马上跟吾回去，还拿迭桩事体告诉了姆妈听。

如风往事之——再话“轧闹猛”（上海方言文章）

        姆妈晓得了以后，啊讲虽然倷迭桩事体做的狭气对额，但不过倷从养下来开始一直到现在，看到倷阿哥多多少少是有一眼吓丝丝额，就好像一只煨灶猫一样，老古闲话讲得特别好，侬格生肖是属蛇，倷阿哥生肖属鼠，照道理应该是蛇盘（缠）老鼠，现在倒是反了一反萝卜颠倒生，变成了老鼠捉蛇，今朝倷居然敢勒辣老虎头浪厢拍了一记苍蝇，覅得了嘛！……

如风往事之——再话“轧闹猛”（上海方言文章）

        第三层意思是讲：上海人狭气欢喜跟风随大流，自家没主见。

如风往事之——再话“轧闹猛”（上海方言文章）

        上海人狭气欢喜跟风随大流，可以讲自家是一眼啊么主见额，凡是看（听）到各类“好额人事物情”，覅管自家欢覅欢喜、适合覅适合，必定要轧一脚参与进去，哪怕只能讲一两句闲话啊是好额，不但是行动上会得迭能去做，还会得去做一个传声筒，跟了大家一道人云亦云一番，而且还要跟所有认识的人讲一遍，甘做一颗墙头小草。

如风往事之——再话“轧闹猛”（上海方言文章）

        有些人看（听）到别人家，通过做各种各样生意，发了一笔财赚到了一眼铜钿，生活啊过的一天比一天好、越来越滋润，覅管自家是覅是一块做生意额料作，是会得跟了人家屁股后头做起各类生意。

如风往事之——再话“轧闹猛”（上海方言文章）

        譬如讲：听到人家讲，开装潢公司蛮赚铜钿，更是钱途无量，就会得跟人家合开装潢公司，过特一段辰光，装潢公司开覅下去关门了；又听到人家讲，做各类玉器生意蛮赚铜钿，能翻十几只跟头，保证只赚不赔，就会得跟了人家一道去做各类玉器生意，还是过特一段辰光，因为覅懂玉器生意经，吃进了一批假玉器，亏本亏得来一天世界；还听人家讲，现在蛮流行去K房唱卡拉OK，问亲朋好友借了铜钿，去开了一爿卡拉OK。……反正是啥额生意好去赚铜钿，从覅考虑后果去做最坏额打算，先去做了再讲伐，如果做了伐好顶多就关门……

如风往事之——再话“轧闹猛”（上海方言文章）

      【备注：①文章为作者原创；②各类“轧闹猛”图片均来源于网络上；③感谢原创图片。】

如风往事之——再话“轧闹猛”（上海方言文章）

        杜老倌侠客居（陆伟）写于2018年06月27日星期三晚上