吾是一个土生土长个上海人，因为沪语方言俚语也是属于吴语体系个，因此讲勒沪语方言俚语闲话当中，有一个词眼叫做“搨便宜”。像“搨便宜”迭个词眼翻译成国语个意思就是讲“爱占便宜”。
像词眼“搨便宜”中个迭个“搨”字，伊老里八早个含义到底是勒讲一些啥么事？！伊个本意搭迭个“拓”字，实则就是一色似样个，就如同是勒“拓碑”，拨碑文上头个字体拨拓成拓片。到后唻就发展成为另外个一层意思，就是指等到拨各种物质侪研磨好以后，从而使得伊成为黏稠个状态，也可以指拨各种黏稠状态个物质摊成薄薄个一层。发展到后唻，就拨引用到画国画上头去，勒国画纸张个上头，随便个去信手涂鸦一些啥个就叫做“搨”。比方讲：“吾随便去搨两笔”“吾勒搨一幅国画哦”“吾就是勒上面随便搨搨罢了”……迭能个三种讲法侪是勒讲画国画，迭就是一种邪气谦虚个表达方式。
实际浪向“搨便宜”迭个词眼，也并覅是上海本土个一个词眼，伊是一个外唻词眼，伊真正个源头是－－从江苏苏州地区流传到上海个，辰光一长久而久之，就变成为上海人个一种方言俚语闲话。
嘎么，有啥个证据为证呢？！但凡是土生土长个老苏州人侪是晓得迭能个一句老话，迭句老话主要针对个就是那些思想有些轻薄，就欢喜搭那些覅同个女性同时乱搞男女关系个男性同胞们唻讲一讲个，曰：“搨便宜货，当心搨出杨梅疮唻。”迭句闲话勒警醒搭警示个作用方面，绝对是不言自明用覅着多讲一眼啥么事个，伊引申个含义就是勒讲，原本想多少能占点便宜，最终个结果反而是适得其反！
《清碑类钞》是吾伲国家民国时期徐珂创作个清代掌故遗文汇编，勒书籍里向就记录有人文、笔记、札记、报章等各式各样个内容。勒里向还记录有迭能个一段文字哦，曰：“揩油，与搨便宜同。”
像“搨便宜”迭三个字，伊个国语读音则是为【tàbiànyí】，到吾所在个城市上海市，则是拨“搨便宜”迭三个字个读音读为【takbhni】，通常唻讲像“搨便宜”迭三个字还有三种解释说明。
第一种解释就是指：占到便宜、爱占便宜、讨别人个便宜。
为此，也只为能更好个说明迭种情况，就让吾唻列举一个迭个方面个例子。比方讲，有人就采用沪语方言闲话唻讲一段闲话，讲道：“伊要么覅去购买各种么事，每趟仔伊要是去购买各种么事个辰光，就是顶顶欢喜搨别人家个便宜唻，要是今早仔呒没啥个便宜好拨伊唻搨搨个闲话，伊就覅晓得去购买一眼啥个么事，伊还交关欢喜讨价还价，哪怕是便宜一块洋钿、两块洋钿，伊也是会觉着是邪气好个一桩事体，认为有便宜好搨勒。老是搨人家便宜是邪气覅好个，长此以往下去，迭种做法侪是要拨人家看覅起个，吾是做覅唻个！”……
像上段文字个含义是讲：某一类人勒买各种物品个辰光，顶顶欢喜侵占各式各样个便宜，若是今早呒没便宜能拨迭类人去侵占个闲话，迭类人就邪气有可能覅会去购买任何么事。迭类人勒购买各种物品个辰光，无论如何也要想方设法个去占一眼眼便宜哦，还要搭商家去讨价还价啥个唻，但凡是经常迭能去做个人，会拨大家瞧覅起个！拨过，有些人是覅哪能爱占便宜个，各种爱占便宜个事体是做覅唻个。
吾再唻列举一个类似个例子，自打吾懂事以后，家母倪榴珍一直是迭能唻谆谆教诲吾个，伊会隔三差五个用沪语方言唻讲道：“覅管是啥个人、勒拉做啥个生活，赚一眼眼铜钿银子，僎是邪气覅大容易个一桩事体，过日脚侪要去精打细算巴结一眼眼，迭样么事确实是有需要再去购买，如果覅是邪气需要个闲话，就覅要去购买，好货覅便宜，便宜呒没好货，勒拉购买各种么事个辰光，切记千万覅好去搨啥个便宜、贪图便宜，凡是一些邪气欢喜搨便宜个人，往往是要吃屈个，还会得拨受骗上当唻，而且伊本人到末脚眼扳数会得去喫大屈个，迭个么真个是叫作丢忒西瓜捡着芝麻，吾个人生也过忒70多年，到勒今早仔，吾为啥呒没去上过一趟当、受过一次骗啊？！就是因为吾本人顶顶覅欢喜去做掰搿各种搨便宜个事体，也是做覅唻个！”……
像上段文字个意思就是勒讲：但凡是对于那些交关爱占一眼眼小便宜个人来讲伐，到末脚往往是要喫大亏个，有些人之所以会多次拨上当受骗，就是有爱占便宜个因素勒里向个，吾个家母倪榴珍因为覅爱占便宜个原因，到今早为止，未曾上过一次当、受过一次骗。
第尼种解释就是指：或勒言语上或勒行动上会去侮辱他人。
再比方讲：主要是指男性同胞会做出迭能个一种覅好举动唻，会轻佻个拍打一下女性同胞，或用手去抚摸女人身浪个某些部位。
第三种解释就是指：总是欢喜倚老卖老以别人个长辈自居。
继续去比方讲：有人会倚老卖老个对小一辈个人唻搨便宜个讲道，而且伊还是采用沪语方言闲话唻讲到个，曰：“吾忒侬个爷老头子勿单单是属于师兄弟道里个关系，而且吾本人还比侬个爷老头子大两岁唻，勒拉拜师傅个辰光，吾也是先比侬个爷老头子拜师，吾就是吾师傅顶顶大个大徒弟，所以讲侬每趟仔只要是看到勒吾以后，是用覅着去讲一眼啥个么事哦，侬就应该先叫吾一声老伯伯侪是对啊，迭桩事体也要人唻教啊，侬哪能一眼啊呒没啥个礼貌个，每趟仔侪要吾对侬讲勒以后，侬僎肯叫吾一声老伯伯，也忒呒没个家教勒！”……
像上段文字个意思就是勒讲：有些大人覅但会以长辈个辈分唻自居，还会讲小辈是属于一个呒没礼貌、呒没家教个人，每趟要等到长辈讲过以后，小辈侪肯叫伊老伯伯，要覅然小辈则是覅会叫个。
除忒吾勒上头列举有关于“搨便宜”迭个词眼个三种解释以外，吾还听到过迭能个一桩事体，对于北方人唻讲伐，经常会讲个一个词眼就叫做“套近乎”，“套近乎”也可以替换成为“搨便宜”。
只要侬搭吾侪是属于一个有心个人，还只要是用心个去观察人类世界，就会去发现有迭能个一桩事体唻，迭桩事体就是－－有些个人或人群个个性搭性格是属于“自来熟”个一类人，也善于搭其他人接触、交往、打交道个，无需用多少辰光，便会搭对方“套套近乎”去“搨一个便宜”个。词典里对于“套近乎”迭个词眼是迭能唻解释说明个：讲“套近乎”是有一种贬义个讲法勒里向个，勒贬义个讲法当中，伊多多少少还会带有“谄媚”搭“势利眼”个意思勒里向，拨过“搨便宜”迭个词眼，则是呒没“谄媚”搭“势利眼”个意思！
上海人或上海人家过日脚，既是会“做人家”个，还欢喜精打细算个过日脚，对于普通个老百姓或普通人家唻讲省一钿是一钿。
上段文字个含义就是勒讲，上海人过日脚是会精打细算个。
勿单单是迭能样子哩，吾勒前头写个“做人家”也同样是属于沪语方言词眼，伊个意思上海人就是用唻形容勤俭持家个好美德。
吾至今为止依旧还能够清爽个去记得迭能个一桩事体哩，勒吾读小学个辰光，辰光顶少起码也要有去经历十年之久，勒掰搿辰光，国家还处勒计划经济个时期里向，掰时买商品顶小个铜钿面值是“分”。具体是哪一年吾则是记覅大清爽，去老爹陆俊德阿奶王妙心屋里聚会个辰光，就看见两位老人相互间争吵起唻，后塞唻吾侪搞明白事体个原因，原唻两位老人是因为“搨便宜”迭桩事体而争吵起唻个。
勒掰搿辰光，老爹是勒市果品公司上班个，伊老人家掰时还弗没退休，一个礼拜也只能回唻一趟，屋里个各种调味品快要用光个辰光，阿奶就让老爹勒伊个单位附近去购买各种调味品，阿奶家个附近就呒没各种调味品吗？！非也，同样也是有个，只拨过老爹单位附近个各种调味品个价钿要便宜一分洋钿到两分洋钿，只听到阿奶冲着老爹大声个叫嚷道：“吾是叫侬去买一包盐回来，侬哪能会得去买一包糖回唻啊，侬哪能连得搨便宜迭桩事体也搨覅唻啦！”老爹讲道：“反正糖也是要用个，等到下个礼拜吾再买一包盐回唻就好勒！”……
【备注：“洋钿”是沪语方言词眼，伊个意思就是指铜钿。】
吾还始终去认为，勒人类个世界，绝大多数个人侪是爱“搨便宜”迭桩事体个，而且还只会存在于多搭寡，是覅会得有其他啥个。
勒吾所在个城市上海市，有一段辰光市政府曾做出迭能一个规定，但凡是年满70周岁个老人，还要是去申领一张敬老卡个闲话，能覅限辰光个免费乘坐各种类型个公交车，有些老人就会乘坐公交车到处去白相，迭些老年人就搨免费乘公交车个便宜。勒其中，有覅少个老年人还会搭上班族们一道乘公交车，辰光一长久而久之，有些上班族们就会有埋怨个闲话，用沪语方言闲话唻讲道：“倷迭帮子老年人轧啥个闹忙啦，实在是有眼拎覅清，吾伲上班族因为要上班个原因，是呒没办法侪唻轧公交车，倷唻勒以后就会造成人为拥挤，驾驶员各种动作又覅好做得忒快，只好放慢速度慢慢较唻，吾伲个辰光多多少少侪拨倷耽搁忒勒，倷迭帮子老年人也实在是覅大识相个哦！”……
上段沪语方言文字个意思是讲，因为有老年人申领好敬老卡以后，勒上班个辰光段内，也搭上班族轧公交车，搨免费乘公交车个便宜以后，覅仅是造成公交车个拥挤，还拨上班族上班个辰光侪耽误。
还有个就是，勒吾个城市上海市开设有各种类型个大卖场，而且绝大多数个大卖场，侪有定点定时个免费班车可以去乘坐个，到各个社区一站又一站个去接人，而且大卖场里个每一辆大巴士侪会坐满个闲话，是可以乘坐45人。那些退休个老人家就会搨起免费班车个便宜，尤其是一到夏天个季节里向，更加会迭能去做，只要是到大卖场以后，还可以孵免费个空调、喫喫免费个食品，屋里向个空调就覅用开，像迭些人还会去认为迭能做个闲话，或多或少能节省一眼铜钿……
上海人极有可能是属于“邪气欢喜搨便宜一族”，还会去认为“搨便宜”也是一种生存个智慧，只有真正有本事个人，侪会去“搨便宜”，顶好还能去寻找到双方共赢个赢利点，侪是叫一个好！
虽讲上海人也是交关欢喜做“搨便宜”迭桩事体，时覅时也会去做做各种“搨便宜”个事体，与此同时，上海人也是顶顶憎恨“搨便宜”覅能做到利益均分、只有一个人能搨到便宜。要是讲，勒彼此之间，只有一方被搨到便宜，另外一方却呒没搨到丝毫个便宜。是覅用多去讲一眼啥么事，彼此之间自然而然就会搞得覅哪能愉快个！
勿单单是迭能样子唻，对于老一辈个上海人唻讲伐，绝大多数个人还是拥有迭能个一种习惯个，迭种习惯就是－－但凡是对于那些邪气“爱搨便宜”“爱占眼各种便宜”个一类个人或人群，还要是讲伊本人，抑或是讲勒家庭成员个里向，绝大多数个人侪是属于铁公鸡一毛不拔个人，而且一贯作风侪是迭能样子个，呒没去做过丝毫个改变，就会去讲讲迭能个一段沪语闲话哦，讲道：“迭个人（迭家人家）真个就是属于一个潮州门槛哦！”虽讲上海人也是属于一个交关精明个人，要是彼此间接触许久以后，碰到类似于“潮州门槛”一类个人，覅但覅会搭迭能个人有丝毫个交往，还会对迭能个人敬而远之！
又为啥上海人会拨“爱搨便宜”“爱占眼各种便宜”“铁公鸡一毛不拔”个人，形容为“潮州门槛”？！迭是有原因搭出处个。
据吾查阅到个历史资料以后晓得，上海迭座城市是中国顶早拨开埠个城市之一，伊勒1843年个11月17日依据《五口通商章程》个规定开埠个。自打开埠以后，就陆陆续续个涌入有覅少全国各地个商人，在掰时个上海滩浪就涌入有覅少广东潮州地区个商人，伊拉主要经营个是各种当铺生意，覅仅生意做得邪气好，还开出有许多分号，而且每开一爿当铺侪有交关好个赢利，成为当铺当中个佼佼者搭领军人物，当铺生意也是蒸蒸日上，财源紧跟着滚滚而唻，屋里富得冒油。
广东地区个潮州人，之所以能拨当铺开得兴旺发达，侪是因为当铺老板既门槛精，还懂得各种生意经，针对覅同层次个客户，会采用覅同个方式方法唻分别对待覅同个顾客，辰光一长久而久之，拨其他当铺个生意也侪拨抢走。伊拉潮州人勒开埠以后个上海滩浪是顶顶会做生意个一类人，勒门槛搭窍门方面也是属于交关精明个一类人。也同样是辰光一长久而久之，上海人就会拨那些“爱搨便宜”“爱占眼各种便宜”“铁公鸡一毛不拔”个人形容为“潮州门槛”！……
末脚唻列举迭个方面个例子，某些人对“喫香烟”迭桩事体也是欢喜个，拨过伊只会“喫伸手牌香烟”，而覅会去喫别个啥个香烟哦。所谓个“喫伸手牌香烟”就是指：某一类人，只会喫别人发唻个香烟，自家从唻覅会发一根香烟拨别人家喫个，辰光一长久而久之，大家就会对伊敬而远之，以后再也覅会搭伊交往、发啥个香烟拨伊喫喫个！【备注：勒沪语方言俚语词眼当中，拨“抽烟”就叫做“喫香烟”。】
既覅会发一根香烟拨伊喫，还会勒背后用沪语方言闲话唻讲伊，曰：“迭只赤佬模子是一只老屁眼门槛邪气精潮州门槛，只会拨铁算盘打得‘乓乓响’，‘喫伸手牌香烟’对伊唻讲就是老喫老做，要是覅拨伊喫，伊还会贼忒嘻嘻伸手问大家讨香烟唻喫，还会讲吾伲做人覅上路，连香烟也覅肯拨伊喫，伊从唻是只进覅出，吾从唻呒没看过伊发过一根香烟拨人家喫，迭种人是顶顶垃西个，连得伊自家个面孔也覅要勒，今早仔碰着迭只赤佬模子算吾路道粗好伐，真个是霉头触到菲律宾，哪能会碰着迭种人，是呒啥好搭伊多搭讪个！”……
【备注：①：文章为作者原创；②：各种上海风景图片、沪语方言侪是唻源于网络上头；③：万分感谢原创图片。】
杜老倌侠客居（陆伟）写于2021年10月23日礼拜六夜里向
网友评论