唔管阿飞有无能力考到车牌，学车日子仲系隔日隔日嚟到。连续三日之后总算喺天地相连，分唔出东南西北嘅野地上搵到方向，不过师傅仲系“咁样唔得，嗰度唔掂”继续闹。学员搵到方向，新教练就正式开车入岑村教练场里面环场驾驶练习。哩度车跟车，车会车唔同野地，师傅话斋，郁下都损手烂脚，大家又系一阵手忙脚乱，臭骂无伦先识得环场驾驶。接住学习斜波起步，兜8字圈，每学一样新嘢，都俾师傅闹好耐先上到手。阿飞唔明白从前以反应快领悟力强著称嘅自己，啲接受能力突然差得咁交关，不知不觉迷茫糊涂，越学越心惊胆战，好似师傅闹斋：“你咁细个人就唔好嚟学大货车啦。”宜家佢真系感到力不从心。
好唔容易捱到去学盘山，哩度最讲够技术，要迅速准确判断喺咩位置起呔转弯，行咩车速，用咩档，打呔回呔要快，落脚呼油要啱啱准，仲要记得打转弯灯。
广州岑村教练场占地面积有好几个大山头，全市驾校培训全部喺度练习。哩度规划设施非常完善，据说香港，日本嘅都比唔上，该要练习嘅什么样高难度路况都有。岑村教练场环境优美，竹林茂密树木茂盛，将满大山嘅各种唔同路形区域分隔开，整个教练场置身翠绿群山之中。
盘山正适合阿飞手脚动作快嘅优点，经师傅指点几下佢就领悟到并顺利完成，师傅仲称赞起嚟：“阿飞，你抓车手势系唔错嘅，就系个人心慌慌，我睇你第日开车叻鸠过嗮佢哋。”咁就轮到其他师兄俾彻底改造过咁闹。学车真系贴钱买难受，每日都经历惊慌失措受气捱闹，大家都讲气话：早知就唔嚟学。师兄弟都系啱啱识，每日见面无咩讲，平时未轮到上驾驶室都准备住担惊受怕捱闹，各人就更加沉默。有排都未到考倒桩，离毕业就更遥远。每人每日都喺心里面计算住日子，数住手指头，计划住使钱。阿飞喺花园酒店除咗输清光嗰200文美金，总算都槽落到3000文，相信学紧车嘅其他人都比佢经济紧张好多，尽管系两日一嚟，但咁愁闷嘅气氛，仍然感觉岁月漫长。喺咁难挨嘅日子中阿飞过咗25岁。
咕咕见阿飞好耐无嚟，又过光明路揾佢，阿飞今晚学车返嚟约咗阿肥去睇阿伦狄龙电影《孤胆警探》，搵佢唔到。咕咕留低话要阿飞返嚟去佢屋企，阿飞睇完电影返到屋企见时间尚早就顺手带本自己中意睇嘅日本推理小说集俾佢，期望咕咕增加睇书哩方面嘅兴趣，同自己有相同嘅爱好，唔好成日惗住感情嘅烦恼，个样好似林黛玉咁阉阉闷闷。 其实，阿飞一直唔中意嚟搵咕咕，其中一个原因就系佢身上，脸上啯种愁闷。
咕咕又系瞓喺床度听歌，落楼开门接咗阿飞上楼，入到房又缩翻上床。阿飞勉强笑住问揾佢系咪有咩好节目，定系心情唔好想揾佢倾诉。咕咕话花园酒店工友聚餐，预埋阿飞，阿飞学紧车无心情唔想去。啯晚两个倾咗好多话题，咕咕心情慢慢好翻好多，10点钟过咗，仲话要去啡厅饮嘢。最后，两个去咗上九路口穗康酒楼8楼嘅烛光厅，咕咕又要饮啤酒。 嚟到啡厅阿飞突然感怀身世，愁怀满腔，无嗮谈情说爱兴致，咕咕成晚滔滔不绝，反而到佢粒声唔出。
几日后嘅一天轮到别组学车， 阿飞休息喺屋企， 啱想做啲自己嘢，咕咕上到嚟。 原来佢又系休息，估计住阿飞今日休息，特意调定同埋休。阿飞要冲牛奶俾佢饮，咕咕话不如落街买面包返嚟 ，加牛奶一齐当中午饭，阿飞只好同佢落街去路口敬义信买果酱，买面包 。阿飞生活作息乱龙，饮食唔定时成日肚疴，早上起身要食热嘅嘢， 宜家唯有陪埋咕咕捱冷面包。隔离屋堂大嫂同侄仔入埋嚟， 几个人一齐午餐都几热闹，食完仲玩起啤牌。 午饭时间一过，侄仔要瞓觉，阿飞间房静嗮落嚟 ，净低佢两个一男一女对住开始有啲尴尬，大家鼓起勇气都问下午点好？阿飞提议去睇电影或者去咕咕中意嘅咖啡厅。咕咕都话唔中意，佢想去行公园游湖，划艇仔，钓鱼，阿飞只好依从。
两个人骑单车嚟到荔湾湖公园，哩度挨近西关半塘，公园门口游人如织。阿飞着住一身鲜黄色嘅运动套装，咕咕着件大红机恤，宝蓝扯布裤。两个黄男红女，鲜艳夺目，而且两人眉清目秀，一个年少英俊，一个青春美丽。惹嚟唔少老年人异样嘅眼光 ，以为佢两个系早恋逃学生。
公园里面好静，湖面静谧，湖水墨绿，只有鱼跃泛涟漪，唔见轻舟荡水迹。阿飞无勇气孤男寡女去租艇仔，咕咕亦无提出。两人踏住小径走过湖心曲桥，漫步公园草丛林荫，咕咕朝着霞光万道嘅落日，一步跃过栏杆喺湖边向阳嘅小石墩坐咗落嚟，阿飞就无嗮滋味咁坐喺佢身边。
湖面微微吹嚟冬季暖风，对岸垂柳摇曳，石砌嘅拱桥上好耐唔见一个游人，凝结一派深冬嘅宁静，咕咕大叹此情此景写意，话系佢盼望咗好耐嘅日子。
阿飞渐渐走神，心情坠入一种自我意境，好讨厌此刻嘅情景，感到喺度虚度光阴，无嗮倾计嘅兴致，顺口回答应酬住咕咕，觉得同佢喺思想上好有距离，突然感到好唔中意宜家两人嘅相处。猛然间惊觉哩啲系一种发自佢一直以来嘅内心本能反应：同任何女性相识，开始 时唔觉得咩，一到深交就渐渐感到吃力，觉得 精神困惑，觉得俾唔到咩快乐人哋，亦感受唔到与对方此刻嘅幸福。
一只小艇由几个男女学生划出湖面，喧哗声打破沉默，从远处清楚咁传过来，冬日逐渐向密林消退，霞光散尽。咕咕话：“ 今日休息系我入酒店以嚟最开心嘅一日。” 阿飞就真系无从谈起，宜家佢满脑子净系无信心考到车牌嘅近忧，同无办法将来搵钱嘅远虑，一直觉得同咕咕只系较好异性朋友尔尔， 可能就系喺哩一条自己定落嘅规则面前感到索然无味 。
咕咕哩个时期揾阿飞更密，知道阿飞有想开的士嘅打算，非常关心并且积极帮阿飞搭路，话读紧书啯度有同学可以帮到忙。阿飞唔知做咩自从同佢去过荔湾湖公园吹风，就更加唔系好中意咕咕，自己都唔知点解，可能系咕咕不时流露出对国外男朋友嘅伤心怀恋，可能系自己无办法开解到佢一面嘅愁容。
阿飞身边朋友都知道咕咕嘅事，多数都鼓励阿飞同佢谈下恋爱。但阿飞三心二意，唔知系搞唔清人哋，定搞唔清自己，对咕咕表现出嘅热情，佢宜家正所谓不知所谓，又不知所措，成日个心就惗住顺其自然吧。
终于到咗落桩嘅日子。虽然宜家12月份，山里面有少少风，但阿飞记忆中自从上车第一日到宜家未落过雨，每日都喺酷热当中度过。倒桩嘅场地干燥得厉害，泥尘飞扬。东风大货车唔系风油呔，原地倒桩打呔重过搬死尸，日日练到腰酸背痛，仲要成日扭头睇位，人人都觉得好辛苦。好在阿飞平时多运动，身体基础好，顶得住每日嘅精神体能双重损耗。学习倒桩移库，公路调头其实几好玩，只系因为要考试，加上咗无形心理压力，心情紧张无人觉得好玩。第一考都唔过以后就更艰难，更可怕嘅系其他人都过咗，人哋已经考盘山你仲喺度考倒桩，剩低你未过就更可怕，哩种想法好似岑村嘅大山路咁重重压喺每个人心头。学车，开车心理压力真系好过硬先得，咪第日出嚟遇到突发状况好容易就会出事故撞死人，所以师傅话能够喺岑村毕业出嚟嘅都唔简单。阿飞不断鼓励安慰自己：“定啲，唔合格仲有第二次，始终会过到嘅，宜家总好过屈喺屋企待业。”
考试嗰日啱好系12月31号，1989年最后一日。强冷空气落广州，老天爷大变脸，黑口黑面将东北雨雪低温翻山越岭带埋嗮过嚟。广州市气温一早就从噙日嘅二十几度变成凄风苦雨，8个人都冻到手赤脚赤，冒住割人面嘅寒冷雨丝摆好竹桩等考官驾临，人人都紧张到唔敢提考试两字。当轮到阿飞上驾驶室，佢已经心脏无多少跳动，脑袋一遍空白，完全凭感觉机械咁过咗一个又一个竹竿，落嚟嘅时候都唔知是否合格，面色发青失魂落魄。
当日好彩，全部人顺利通过第一考。中午庆功宴同师傅开车去起义路食狗肉御寒，欢呼声震耳欲聋咁从饭店二楼飘向乌天黑地嘅雨天，大家饮完一杯又一杯高粱酒，感激多谢师傅嘅悉心教授，师兄弟都熟络老友起嚟，透过碳炉煲狗肉浓香，流露滚烫心窝嘅友情。饭店外，寒风暴雨越嚟越猛烈，阿飞有啲醉，但知道真正艰难嘅盘山，路面考试仲喺后面，离毕业仲有45日。
网友评论