东风路东豪涌边有间乜鬼名堂联谊舞厅，里面人影浮动，彩灯四射， 强劲嘅音乐打动人心魄， 催促人起舞。
大头民， 荷包蛋，阿唐 三个人走 入 舞厅。 表妹同两个 女 仔 已经响度， 无非小丽， 小红。大头民同 表妹 咬几句耳仔 。一齐都 坐落， 阿唐 好似 间中都有嚟，见到女仔对眼就柔情出水。表妹 招呼热情，急忙去柜面摞啤酒花生。 两个女仔见荷包蛋衣着朴素貌似个帮闲，一啲无在意佢。
荷包蛋 第一次入舞厅，仔细打量四周，地面水磨石做，天花吊满射灯， 中间 一个 旋 转玻璃球 将啲射线撞到五彩缤纷。 舞厅 暗 黑 认唔出鬼打鬼 ，彩灯随音乐强弱闪动，音乐亦快慢轮换播 ，荷包蛋不懂音律 唔识跳舞， 只 知道音乐 强 劲系的士高， 曲调柔和 叫交谊舞。
阿唐屋企喺光明路后面街嘅六甫水脚。修长嘅身材玉树临风，鬼鬼哋样嘅面上有个好标准番茄下巴，上初中无耐脸上两腮开始发青，立下眼成个阿伦狄龙咁有型。但华仔，阿飞，阿荣都叫佢新疆佬。阿唐爱打扮识着衫，读书嘅年代已经着一套套“凡立丁，华达呢”四个袋中山装。宜家改革开放跟香港潮流着喇叭阔裤，窄腰短袖猎装。举手投足潇洒十分：总系将手臂伸长，好有波浪节奏咁一抽搐，好耐先至指出佢想讲咩。有次，派出所专区民警“侧头鱼”见到佢哋成班人都着成清一色咁样聚集喺荷包蛋五金铺门口，就从对面派出所行过嚟问：“你哋做到啲裤脚咁鬼阔做咩啧，好威咩？”大家一时无声，个个尴尬。好耐一阵阿唐扬手一抽，摁两摁条腰，话：“方便个裤裆透凉啫，等啲风喺哩边入嗰边出。”连侧头鱼都一齐笑嗮。佢成日话自己完全可以当时下流行嘅明星挂历封面。
阿唐小学同阿飞系同班同学，因为学习张铁生交白卷唔够认真，上课嘅时候唔留心听班主任 读 手抄本小说，俾调咗去同全班最曳嘅阿飞坐，群埋一齐胡天胡帝识到大头民 ， 阿庆班结拜兄弟。小学毕业一齐升去广州市 三十二 中，阿飞个百厌星君无读半年就因为 被告发 参与越秀山公园抢夺被学校开除退学回家。阿 唐 无嗮心机，返屋企亦嘈住话要退学，兼夹开始时时逃学。佢老窦无法子只好同佢办理 咗 退学，等佢喺屋企闷得一头半月，又唔玩得咁多嘅时候，揾关系将佢转学到河南海珠区啯边一间中学继续读书。
阿唐踏入新学校新班室，瘦长嘅身高，青春阳光个英俊样，嘈杂嘅班室一下子全部静嗮。由于佢系插班新嚟，班主任老师将佢暂时安排喺最后边角落同一个高个女同学坐 。 女同学有对乌黑嘅眼睛，两趟黑擝擝眼眉，面上有少许暗疮。阿唐经过佢身埋位，闻到女同学身上飘嚟淡淡嘅异性成熟气息，女同学仲望 咗 佢深深一眼，充满无限温柔，阿唐立即气息紊乱呼吸不畅。 女同学叫阿洁。
上课嘅时候，阿唐仲系心不在弦，佢本来就系无心向学嘅人，多数时间去惗佢 啲 结拜兄弟，惗吃喝玩乐。
女同学返埋位。阿洁今日着一条淡粉色碎花百褶长裙，一件水蓝色的确凉上衣，初夏天气，清爽宜人。座落位嘅时候，长裙擦过阿唐嘅手臂。眼前掠过一片花海，阿唐觉得条裙 啲 碎花好好睇，眼都花埋， 个心从未有过卟卟咁跳。
阿唐从未有过咁 想 返学。早早坐喺后边，留意住隔离位返嚟，留意住佢着咩衫返嚟。一接触到阿燕有时望过嚟少女嘅媚眼，一脸熟透嘅羞涩。阿唐就觉得自己好似有 啲 发紧低烧咁，一种暖暖嘅热流好舒服咁喺身体淌漾。渐渐隔离位女同学一条素色嘅裙一件净色嘅衫，阿唐都觉得佢好动人。阿洁只脚长，有时有意无意伸过嚟顶住阿唐个膝头，阿唐羞到满脸通红，但又唔舍得缩开。佢每日渴望住隔离位女同学带俾佢嘅心跳感，啯 种 心跳感好似俾跟 啲 大佬去打交，去越秀山公园 噤 兵仲嚟得更强烈， 就系咁 懵懵懂懂上完每日嘅课。 正喺度胡思乱想发藕，阿洁用手踭撞下佢，阿唐块面即刻红到落耳根，望望前面黑板，老师并无注意 哩 后边。再睇阿洁正一本正经听课，只手踭又碰过嚟，仔细一望，原来佢手踭下压住一张折埋嘅字条。阿唐一阵激动，执起嚟打开。单行日记本撕落嚟嘅纸上面，娟细工整写住：“你喺河北过嚟嘅？ ” 下面仲画 咗 一对向下弯嘅眉，一勾向上翘嘅嘴。 阿唐推翻过去，笑眯眯侧头对阿洁点点头。阿洁写几个字推返嚟：“边间中学？”阿唐惗咗好耐先细细声讲：“三十二中。”阿洁用嘴做咗个O形代表“哦”，问：“你哋啯边玩咩多？”
、、、、、、“踩屐。”
阿洁一下嚟咗兴趣，眼睛大了许多：“去边度踩嗝？”
“文化公园。”
“下次去带埋我，你教我踩。”阿洁面上有少许红。
阿唐，问：“河南哩边都有得踩，我哋个班咁多男仔，做咩唔叫佢哋啫？”
阿洁：“你唔知咖啦，我哋班啲男嘅好卜佬咖，河南地啲人系咁咖啦。”
阿唐内心兴奋，同阿洁约好 去文化公园踩雪屐， 晚饭后喺南方大厦聚齐。之后两个就晚晚相约、、、、、、
阿唐老窦亦喺青春过嘅人，自从《羊城贺岁万家欢》之后，屋企就随着南风窗时时飘响《今朝有酒今朝醉》、《每当变幻时》、《十个女仔》啲靡靡之音。当哩日早上飘到《尖沙咀 susce 》嘅时候，阿唐着住睡衫拖住个女同学从自己嘅房走出嚟，佢老窦老母，三个家姐妹都目瞪口呆，世伯手上啱冲好嘅杯红茶菌仲差啲跌咗落地。
阿唐初中毕业后入咗老窦嘅单位亚洲汽水厂做临时工，每日喺厂里面剥橙俾车间做果汁用。 越过一堆堆埋头剥橙嘅肩膀，前几排一张青春秀丽嘅脸好勇敢咁转后嚟搵佢张望，一啲都唔怕羞，虽然满脸都系红晕。阿唐好自然迎住佢对视，笑。哩个女仔一头流行秀芝装式短发，一对艳丽无暇大眼睛。比起梳一对粗黑孖辩嘅阿洁更新潮、、、、、、
今晚嚟到佢第一眼芨 中 小 丽。阿唐宜家喺光明路有个外号，人称“情场浪子鬼见愁”。 根本唔使介绍就拉起频频打量自己嘅小丽落场跳舞。 拖住女仔嘅手，一种莫名 兴奋 涌上心头。佢觉得 小 丽身上嘅少女气息清新，雪白嘅碎花裙动人心魄，大方爽朗嘅笑声令佢神往。两人儿 跳完 一圈又一圈， 小 丽将少女情怀尽情展现，阿唐热汗飞溅，头重脚轻，啯股 欲望 暖流 由心脏直达下体，又由下体直击脑际 。
大头民 趁表妹行开乘机邀请小红落场，佢 把口好使得嘅，死都拗返生啯种。 小红都系舞场中人，两个 尖叫声同欢笑声此起彼伏。见到佢 哋 玩 得 不亦乐乎，， 荷包蛋 有 啲 唔系 滋味， 觉得好无瘾 ，大杯大杯自斟自饮表妹攞嚟嘅啤酒。 大头民 ，阿唐 出去跳完返 嚟 ， 荷包蛋 吓 咗 一跳， 见佢 两个双眼闪住 绿光 ，白 恤 衫 上点点 冷冷 滢 彩。 荷包蛋仲 以为 自己饮多两杯 啤酒，醉眼分 花，表妹讲哩啲系射灯做成的。
小丽，小红 去大门口 拖咗 四 ， 五个呤 仔 入 嚟 ，个个都喺短外衣，宽裤，波鞋，对袜包住裤脚。 班人 一落场就跳起霹雳舞，翻跟斗 竖蜻蜓 ， 忽而月中漫步忽而新疆婆使颈， 似模似样。扭 转 到 舞场 中 心，其他人 个个停嗮 ， 围住 佢哋 喝彩 ，犹如万众瞩目嘅 舞 场英雄。 音乐一停，大头 民 欢呼 住狂 冲过去拥抱， 拉嗮班英雄 一齐埋 嚟，吆喝住表妹 再买啤酒花生 。 虽然班舞士都有同 荷包蛋 客气打下招呼 ，但荷包蛋 觉得 哩 度真系唔 啱 自己。
返归嘅的士里面大头民对荷包蛋讲：“表妹弹咁多女，次次出嚟接波你都接唔住。”
荷包蛋话：“嚟哩啲地方唔盏鬼，哩度啲女唔啱我，哩啲女都系出嚟玩玩下嘅。”
大头民话：“你定啦，仲有大把女。去完闸坡返嚟先啦，上年你哋去咁好玩无同我去。 今晚阿唐只衰仔又有女睇啱啦，小丽好似几中意你啵。”
“系咩？” 阿唐诈诈帝咁，静咗一静，佢慢条斯理开口讲： “矮 就 矮 啲， 不过 几 靓。”
大头民讲 ： “中意咪去马啰 。”
又静一阵， 阿唐讲 ： “咁我去嗝咯啵。”
“去啰。”
静咗好耐，阿唐讲：“啱先几激啊，同条女跳到我好似出咗嘢咁。”
网友评论