阿庆屋企喺光明路阿飞右边嘅斜对面金星仪器厂旁边。连阿飞左边斜对面嘅华仔切纸铺，佢三个屋企啱好似个等边三角形。佢同荷包蛋，大威，辞差，阿荣系中学同班同学。阿庆系大仔，排第二，上面仲有个家姐，全家七个仔女。一家近十口人住喺单位嘅公房，屈喺间屋最后面，最潮湿狭窄嘅地下。老窦将靠墙两边都钉成木阁楼，将仔女全部吊上半空瞓。个个营养不良，饿到皮黄骨瘦，衣服就更乱笼，两公婆全部买嗮男装，家姐着完到大佬，着完到个妹，最后到细佬，上衣领补烂，中间衫钮钉过大细唔同式样，下面裤脚收短，前面膝头遮块布，后面萝柚整哒嚹，着上身就返学。七十年代后期，仔女越嚟越大，屋企开销更大。佢老窦就开始倒卖粮票等各类国家限购票证，数额巨大，比公安捉住按“投机倒把”判咗几年劳改。放监出嚟后就喺屋企用啲生锈铁线套上五颜六色嘅塑料管，屈做成晾衣架。日头做，傍晚攞去人流好旺嘅人民路上九路口偷偷摸摸摆卖。见个仔日头游手好闲，晚上成群结队，知道咁落去迟早有日会出事。就跟踪个仔，曾经多次成功喺深夜将个仔劝返屋企，搞到大头民阿飞阿唐班兄弟唔喺认真大阵仗嘅节目都唔敢去叫阿庆。嗰次，老窦将佢喺越秀山公园派出所领返嚟之后，苦口婆心同阿庆讲：“你无咁大个头，就咪戴咁大顶帽。我哋屋企三九二丁七，钱都唔多个。人哋屋企人横有所持，大食有指拟，你跟住佢哋玩唔过嗝。人争一口气，树争一层皮，你做大嘅要帮屋企争返啖气先至系咖。你继续咁落去同佢哋出去学人抢劫，买定棺材掘定氹啦。”
“咩啊？”
“等死啊！”
经济改革开放，阿庆高中毕业领到广州市“个体户”牌照，正式喺人民路摆街卖衣架。正所谓，父子齐心其利断金，更何况一家十口人嘅力量。唔使几耐就开始做到衣架批发商，两仔爷喺人民路大新路口租咗个铺面，批发衣架，兼卖服装，手袋等时尚产品。老窦喺外面跑业务，阿庆坐镇档口做批发。订货量多到一家人都忙唔过嚟，阿庆同老窦讲：“不如将材料，铁线，塑料管发俾人外包，等人哋喺佢屋企同我哋加工，然后交货返嚟，我哋俾加工费。”老窦觉得个仔读过高中真系唔同，同意咁做。阿庆揾住喺内街兄弟姐妹多啲旧同学帮忙加工，仲揾到亲戚表兄弟好似韦明咁帮手。一下子能赶出好大量嘅货，生意好到忙个不亦乐乎。
阿庆喺人民路开档口，荷包蛋同佢打工看档。大头民，阿飞，阿唐就时不时，候佢老窦唔喺度成班人就去档口玩。阿庆喺档口后边，踎喺张床上同人玩“暗底”。对面喺个乡下模样嘅中年人，一听最细10文地水咁大，成班人都唔敢埋去，企埋一边观战，赌注太大气氛紧张到想失手杀死人。阿庆已经输咗300几文，乡下佬笑到弥勒佛咁口脸。阿庆不形于色，从裤袋揞出个精美嘅“刁亢”火机，金光闪闪。自从搵到钱，宜家阿庆身上着嘅用嘅都系贵嘢，香港明星，外国电影鬼佬着啲时装，阿庆好快就着上身。阿庆点着支烟，摆低个火机喺台面，扐起副啤牌洗牌，乡下佬伸手抽起面头几张牌插入中间，阿庆然后慢慢咁派出啤牌。又奇怪啵，食咗支烟之后接落嚟乡下佬就系咁输，最后输清身上800几文嬲爆爆走人。
乡下佬一出门，阿庆高兴到跳起，扐起件名牌西装，随便披上肩膊：“走，去人人宵夜，你哋返去光明路揾齐人。我同伟明去开位先，今晚食好嘢。”
西壕二马路嘅人人菜馆系间通宵直落嘅餐馆，喺广州好闻名，对到正广州电影院，哩度24小时都好旺。夜场一散，人头涌动。人人里面更加系喧哗，全广州市夜猫都喺度。
大家喺角落搵到阿庆。
“好彩，我地嚟先啫。”伟明讲。
“哗，求先好险，我见你开头输咁多。”阿飞屎忽都未落座就呱呱叫。
“我见你开头啲牌弱到死。”大头民都余震未过。
“好彩先输后赢。”咁刺激嘅赌博阿唐兴奋不已。
阿庆一直都无出声，一脸奸笑，黑瘦嘅面上既似胸有成竹，又似运筹帷幄，仲有啲高深莫测。佢叫咗昂贵嘅炆黄猄，啫黄鳝，艇仔粥，三星炒米等。食饱之后阿庆心情舒畅，到底后生定力未到家，忍唔住讲：“其实，我求先系出千赢佢嗝。”大家停低嗮碗筷，“我咪攞咗只“刁亢”出嚟摆响台嘅，我每次派牌经过只火机咪事先睇到嗮佢啲牌咯。”大家听完，个个佩服到佢五体投地。
食完宵夜，埋单接近400文。大家正行紧出门，阿庆叫：“死啦急屎添，边个有纸巾？”
成班人都无啲咁嘢，阿唐话：“我去士多帮你买啦。”
“唔使啦，好急，比几张散纸我得啦。”阿庆叫到。
大家问：“攞散纸做咩啊？”
阿庆喺伟明刚揞出嚟嘅一抓纸币度攞咗几张1毫纸币：“抿屎。”
大家心悦诚服到直头想对佢顶礼膜拜、、、、、、
阿庆喺加工衣架过程中发现塑料胶管价格不断上升。攞返嚟大批货放喺屋企仲未嚟得切加工成货品，塑料胶管价格已经升到高过衣架成品嘅价钱。佢开始转做倒卖批发塑料胶管生意，过咗一阵又发现塑料胶管价格俾人操控住。要想揾大钱，就要有第一手货源，如果自己能够生产出塑料胶管，咁利润就可观了。阿庆同老窦倾过之后，决定返粤北乡下开厂做塑料胶管生产。
网友评论