喺酒店做嘢已经两个月，阿飞仲有时会不自觉想起英姐，想起佢一往情深嘅关怀，欠佢好多嘅情义。月底休息，中午时终于的起心肝打电话返商店，英姐啱要落班，即刻约佢到珠江边南方大厦十楼饮下午茶。阿飞着整齐先赶去开定位，啱开好茶位，仲未嚟得切冲滚水。就见英姐一身奶白色女式西装，蓬松云鬓，风姿迷人从门口走嚟。阿飞个心即刻局促不安，面渐渐不自觉有红。英姐落座就唠唠嘈嘈话个外甥，即佢家姐个仔下个月结婚，要换代用卷买洋烟洋酒，问阿飞喺酒店帮唔帮到手，阿飞一口应承。两句未埋尾，茶市就话收，要为夜晚酒宴提前做准备。阿飞抢住埋咗单，英姐带佢落楼下假二楼西餐厅继续饮咖啡倾计。
“你瘦咗，阿飞。”英姐幽幽咁讲。
两人卡座之间飘嚟英姐身上熟悉嘅人参胎素美容膏香味，混杂住诱人嘅成熟女性气息。阿飞忍住唔透气，正眼唔敢同佢对望。觉得咁样同英姐饮咖啡都好有罪恶感，都好似插足人家感情，十分堕落。饮住咖啡，英姐约阿飞下星期一齐休息食饭，顺便攞代用卷。
阿飞搵茹女帮手问酒店门童换咗代用卷，因为酒店门童好多外汇小费。点知第个休息日喺屋企等咗一整日，英姐无嚟到。对于今日嘅约定，阿飞内心系又惶恐又唔好推却。第二晚落班返屋企英姐先嚟，话佢阿妈，妹妹两个人都入嗮医院，以后怕有一段时间好频扑唔得闲，攞咗代用卷滚水渌脚咁走。
好快到咗年底，大惠真正到咗21岁生日。大惠纯真甜美，心地善良，说话慢条斯理，孜柔啖定，从嚟唔会与边个有尤，深得全组人喜爱。副组长玉姐想巩固喺大烫组嘅地位，喺自己屋企请组里面员工打边炉，为大惠搞咗个生日晚会，庆祝佢21岁。阿飞一心只想槽钱学车，本唔想去，但大惠同佢特别好，唔去太扫兴，可能连好朋友都无得做。唯有同大家夹钱送咗个生日蛋糕，另外送咗一筒年头元旦去从化玩，顾住赌无用过嘅菲林做贺礼。佢都系第一次参加少女嘅生日会，嗰晚仲认识咗大惠个男朋友阿明，系个一表人才嘅男仔，同大惠衬到绝，连阿志都同阿飞讲：“佢两个真系有夫妻相。”大家一边食一边影相，喺生日贺卡上传递住写上祝福语，阿飞老老土土写咗：
福如东海，寿比南山。哩两句其实应该写俾佢阿嫲至啱。
然后喺生日蛋糕点蜡烛许愿，帮置身于贺礼中，生日烛光里嘅大惠影相留念。望住摇曳掩映中，美丽嘅大惠泛起招牌式甜甜嘅笑容，阿飞竟有啲醉了：太美啦。
天气已经入冬，气温转冷，马路萧条。阿飞迎住劈面寒风归家，望住冷清嘅夜空一勾弯月，突然惗到：“咦，今日都系我24岁嘅生日呀。”花园酒店份工虽然好，但驾校通知一到就必须离开，阿飞内心百感交集，充满悲伤离愁。正是：梁园虽好，终难久留。
第二晚落班，阿飞去员工单车棚攞车，一个姑娘仔推住单车迎面出嚟。认得佢系隔离干衣组嘅，成日同大惠，细惠玩埋几个女仔之一。啱想笑住敷衍几句，个姑娘仔却抢先问佢住边度？话要一齐走，阿飞要佢等等自己去攞单车先。喺路上，阿飞边踩边问佢住边度，又咁啱，姑娘仔竟然就住喺青年路荔湾公安分局旁边条巷，大家原来系街坊。
姑娘仔好多嘢讲，一路上未停过口：“你觉得喺花园酒店做嘢点啊？”
“你有啲咩长远打算啊？唔会惗住成世喺度做呱？年青人应该为未来多啲着想。”
“你话人与人之间系咪好难互相信任啊喇？”
最后连对阿飞个人都做埋评价：“我见你做嘢都几为得人嘅，你讲嘢几有文化，有啲逻辑性。”阿飞嗰晚俾人一轮嘴问到返屋企，姑娘仔仲话倾得好过瘾，第日有机会再倾。阿飞平时无留意人家叫咩名，唔知佢有几大，净记得佢个人喺洗衣房性格好好强。有时都会一齐讲下笑，听过佢讲忙住考紧辞差嗰种晚上返嘅大学，每次同亲阿飞争论唔够讲就整句：“do you understand!”虾阿飞唔识英文。阿飞唔喜欢哩种人：“扮卵嗮嘢。”
开心嘅日子好快过，转下眼秋去冬来，三个月试用期过咗去。驾校嗰边毫无动静，阿飞只好同酒店签落5年嘅正式合同，工资升多50文一个月，到时如果提早解约要赔付一个月工资。阿飞唔计得咁，只能多见步行步。阿志喺洗衣房得罪人多，明白到喺度做5年唔使有运行，签咗正式合同后申请调咗去酒店消防部。大惠证件有问题，原来一直都无同酒店签正式长约，试用期又过去太耐，最终被酒店喺新年嚟到之前劝退咗。年底，酒店工会，团委联合组织去南湖乐园踩屐溜冰。原价16文嘅门票，只需5文，酒店豪华旅游大巴接送，大家都话抵到烂，个个踊跃参加。当晚阿飞喺溜冰场出尽风头，只因为开正佢嗰蕃，十几岁已经着住凡立丁，喺文化公园，少年宫，西郊泳场各区屐场盘旋翻飞，离心独劈，运转乾坤，日夜流连忘返，正所谓系佢拿手好戏。阿飞拖住大惠疯癫咗成晚，第日两个人都话腰酸骨痛厉害。大惠临走请大家到屋企聚餐话别，互相留低通信方式，各人依依不舍离去，开心亦随之离去。
网友评论