第七章
1988年，部分经济效益好嘅单位陆续起建楼房，作为单位宿舍分俾职工解决住屋困难。亚洲汽水厂无疑系绝对最受益经济改革带嚟嘅财政效益飞跃，阿唐两仔爷哩年分到位于水荫路嘅汽水厂新宿舍，下个礼拜日就要搬走。
阿唐屋企只得佢一粒仔，其他几个都系家姐同妹。哩晚，阿唐过光明路走访，为礼拜日搬屋通知定大家到时帮手，顺便聚一聚，打番场盛大告别赛。阿飞，荷包蛋都喺屋企，华仔老窦唔俾佢出夜街，佢哋三个去带河路搵埋阿荣就去高基街搵大威。大威落到楼嚟话以后唔赌啦，女朋友落咗最后通牒敦促一定要戒赌。荷包蛋一听触动心事即刻无嗮心情，仲打起连天喊露话要返归休息，各人唯有尽散。
知道阿唐搬走，告别赛又玩唔成，阿飞愁从心底起，忧向烦恼思。近来大家都心生倦意唔多想赌。其实大威，阿荣，阿飞，阿唐几个聚赌都只为联谊开心，荷包蛋，辞差都唔系想赢大家啲钱，只不过因为无聊，聚埋打打啤牌大嘈大吵一餐大家高兴，佢哋输钱都兴高采烈戥 赢钱嘅开心，讲实你赢得到佢几多？夜茶又成日荷包蛋埋单阿飞都唔想去。宜家阿唐搬去嘅水荫路靠近市郊天河，同光明路离天隔丈远，想返嚟都唔方便。
礼拜六晚唔知出于咩原因，阿唐老窦要突然连夜搬入新屋。荷包蛋去咗个表哥婚宴度做案兄弟无办法行开，大威被女朋友劫持住，辞差又返紧学，阿唐只能临急搵到阿荣，华仔，阿飞三个。阿飞一睇搬屋咁大锅连忙去六甫水脚阿唐嘅隔离屋，搵埋佢哋嘅小学同学阿肥：“阿唐要搬去天河嗰边啦，一场同学，眼睇要天各一方，以后见下面都难。”
阿肥同阿飞好老友，两人爱好相同，性格相似。 细路嘅童年无边个唔中意公仔书 ， 阿飞，阿肥都唔例外。 公仔书里面嘅历史故事，英雄人物深深影响佢哋从细嘅启蒙认知。 《 三国演义 》、《铁道游击队》、《李自成》， 本本都激励鼓舞佢哋嘅斗志 ， 喺佢哋童年心深处埋下黑白分明、争强好胜嘅性格烙印。同样，一本本，一册册嘅公仔书记载咗佢哋成长嘅历程。
七十年代，佢哋返小学嘅时候，每日放学总系约埋老道，老懵三几个公仔书迷，一起到广州嘅新华书店“巡书”—－寻找各自喜爱嘅公仔书。嗰时候，广州新华书店好多，而且集中喺珠江河两岸一带。佢哋几个小书迷先系沿人民南路南方大夏附近两间开始，再经过人民桥过河南到桥脚洪德路书店，然后沿滨江路过翻海珠桥折返河北到北京路，哩度到中山路最多新华书店，可以一间接一间沿途“巡书”返屋企。咁样就可以将广州大部分新华书店都行遍，整整绕大半个广州徒步半日。嗰时候，无宜家交通咁方便，而且坐公交车都唔系佢哋负担得起，为咗节省每一分钱买书，每次佢哋总系徒步行个大半天时间。每次返到屋企，大髀好似灌满铅咁沉重同酸痛。嗰种感觉，大个仔之后惗返起嚟都觉得傻。但每次发现书架出现中意嘅新出版公仔书时，嗰种喜悦心情又系用多多钱都买唔到嘅，无办法用宜家嘅欲望追求嚟比拟。比如当年热追嘅15集《岳飞传》、10集《铁道游击队》，集齐嘅过程同感受，宜家惗返起嚟都仲非常享受。
买返嚟嘅公仔书唔单止可以欣赏，仲有嘢学 。学书里面嘅英雄， 模仿故事里面情节，舞手弄脚学武功， 学打交。 打上格仔学画画， 咩 “岳云跃马飞锤”，“关云长过关斩将” ，一幅一幅临募。文革前后嘅公仔书，绝大多数由国内 工笔名家， 白描高手所画，嗰啲年月不为名利所累，幅幅画工精美，非常有艺术价值。
渐渐长大， 个个出来工作融入社会，童真渐渐失去，小时候一起“巡书” 嘅公仔书迷各奔东西。只有阿飞，阿肥仲坚持“巡书” 哩 一习惯 ，有空闲就相约起步 。 宜家，佢两个一直想收藏到传闻散失咗嘅《水浒传》公仔书，除咗想完细个嘅心愿 ， 同时充实平淡又平凡嘅生活。
阿肥即刻放低啱攞上手碗饭，唔使讲嘢就嚟帮手。一部两房一厅货车连夜来回搬咗四趟，好彩阿唐新屋分喺二楼，搬得唔系好辛苦。到礼拜日，荷包蛋，大头民因为档口繁忙无法抽身，只有大威，辞差嚟埋帮手搬啲手尾。阿飞噙晚搬完返到屋企就肚疴，一早去六甫水脚另一边街尾嘅公用屎坑拉咗一大滩，肚痛完又头痛，周身唔舒服，但都勉强过埋嚟跟车到新屋。全部搞掂嗮已经中午1点钟，阿唐请大家到水荫路环市路口饭店食中午，大家先发现汽水厂原来就喺对面，佢上班好近。“阿唐以后更加唔容易返光明路行下。”阿飞惗。
饭后大威，辞差，阿荣，阿飞四个打车走。阿飞个头痛到要爆，车就直接开返佢屋企。食咗头痛散，开煤炉煲热水洗过面，打开折叠辘架床着埋件皮褛寝含棉胎包实瞓。入夜更厉害，全身滚烫，头沉骨痛一阵冷一阵热，肚里面咕噜咕噜响。虚汗好似崩塌大坝咁，叭叭咁出，翻来覆去烧醒。但个大脑非常清晰，不断勾起哀愁：“好友搬走，无人聚赌，早晚孤独，迟早孤单。”心底深处涌出心灰意冷，骤觉生命索然无味。鲁迅讲：“人的缺点就是会饥饿，要填补缺点就要钱。”人越无钱就越自卑，越自卑就越要面，越要面自尊心就越强，越强就越觉孤独，越孤独对生活越感害怕。哩种心情喺《鲁迅全集》阿飞搵到嗮共鸣，以前感觉鲁迅系个唔食人间烟火嘅伟人，唔识人情世故，唔懂儿女情怀，系个读死书嘅书呆子。读完明白到鲁迅同普罗大众一样为生活艰苦奔波，为社会状况苦恼，为现实不公愤怒，为国家积弱不争。更佩服鲁迅嘅系有勇气胆量彻底反省自己。阿飞从鲁迅嘅作品觉悟到：“一点嘅快乐希望足可匹敌十分嘅忧虑。”之后佢迷迷糊糊不省人事。
第二日返商店值夜班，烧已经退，但人仲懵懵闭唔多清醒。唔清醒中记得荷包蛋，大头民上过嚟叫去食饭，宜家大头民喺荷包蛋档口打工，两个经常出双入对。三个人上咗部的士直奔一间园林建筑风格嘅宾馆，入到一间厅房，里面亲朋好友满座，主人家原来系好耐无见嘅结拜二哥阿庆个老窦摆寿酒，大家隔台相望，都唔知从何说起。阿庆越发精瘦乌黑，成支农村乡下饱受风霜嘅老竹杆。
网友评论