问得嚟，浴室早被大威霸占，其他人即刻摆开大弟阵，孖份玩“锄大弟”。荷包蛋孖阿唐，大威孖阿荣，阿飞孖华仔，辞差单打独斗。大家一个个轮住去唯一嘅冲凉房浸温泉。华仔个人反应慢有名药材铺，阿飞唔放心俾佢一个人打，寸步不离一直唔敢去冲凉，辞差一个人亦去唔到。玩到半夜凌晨4点，个个浸完温泉根骨松软，喊露连天都话收摊要瞓，剩低辞差同阿飞两个未冲凉。辞差话佢要冲先，声明会好快搞掂，阿飞易话为就让佢去先。辞差带齐面包果酱，大学论文资料入去，一浸就好半天声息全无。全部人瞓嗮，阿飞等得火起，兵兵乓乓打冲凉房门叫，辞差一于阔佬懒理，瞓响个浴缸浸住嚟听walkmen。“你唔好出啊，我掟嗮你啲衫裤出走廊，唔好话我唔提醒你，听日无衫裤着唔好发烂渣。”阿飞讲完真系将佢个背囊掟咗出门口走廊，然后返入房和衣上床同华仔孖铺瞓。辞差出嚟发现真系无咗自己袋行李，佢又嚟踢阿飞间房门，对面房荷包蛋嘈醒咗，发大火冲出嚟，两边同时开门，一齐将辞差追出走廊外边。阿飞乘机将大房门恤死，任佢喺走廊死拍烂拍一于大觉瞓。闹咗半天，嘈醒埋服务员，最后由服务员嚟开门，辞差先返到入房瞓。
阿飞好快瞓着：突然台面落咗个九十JQK，阿飞跟手一个呼噜A打过去，睇下手上仲有对2，心里面暗暗发笑。突然听到阿唐把声闹：“你班柒头，半夜三更嘈到瞓都瞓唔到。”辞差把声应佢：“我都未浸够，啲閪佬就拍门嘈喇。”阿飞一惊：“我浸都未浸过，只辞差又嚟？”即刻扎醒，马上抽离啤牌大战梦境，冲出去霸浴室。一米半长白瓷浴缸，两个水龙头一冷一热，关中间嘅制，水就改从头顶花洒而嚟，水温正好，阿飞廿几岁仔仲系头一次浸浴缸，瞓入暖水中浮浮沉沉无有知几过瘾。听到外面华仔把声闹：“死飞头，成晚发开口梦，对A，对2，大。”阿飞心里面暗暗偷笑。
冲完凉换好衫，前台服务员嚟通知：佢哋要订嘅今日返广州车票无嗮。大家怀疑系因为噙晚吵闹，服务员故意玩佢哋。无办法，荷包蛋，大威只好出去搵车票买，佢两个心有所属，都急于返广州。阿飞赢咗钱，了无牵挂，却想要去天湖影相。
“有鸠嘢睇咩。”阿唐阻止佢。
“有閪好去。”阿荣劝阻佢，佢两个噙晚都系输钱嘅。
“有瀑布啊。”阿飞坚持。
“叼，好似水喉咁鸠细。”阿荣讲。
“系啊，仲衰柒过我哋宜家住间房个水龙头。”阿唐讲完自己都笑。辞差浸饱出浴，一身光鲜打扮，金丝眼镜衬托起个无赖样飘逸洒脱。大家不禁佩服只衰仔有旅行经验，出门从容不逼。嚟嘅时候着得随便有道理：反正要长途跋涉逼客车，干净衫裤嚟到酒店冲完凉先换，正好。
“去乜柒吖，天湖水都无嗮湖都干咗好耐啦。”辞差一语定音，佢都输唔少。所有人返酒店又捉对孖份搏杀。再轮住去浸温泉水，阿飞紧张输赢始终无机会再浸到第二次。
“哩啲水到底系咪真系温泉？”人人都有哩个疑问。
“肯定真嗝，求先行过河边见啲水都热到起泡。”阿唐讲。
“就算系都无咁多你浸，你唔见酒店后面几个大锅炉。”荷包蛋讲。
“啲水咁浑浊，会唔会人哋浸完先到我哋浸？”阿荣问。
“梗系啦，你就想浸第一斟水，全部都系领导人浸啦。”大威讲到似曾曾。
中午无饭食，好在买咗面包嚟。阿飞攞出随身携带嘅猎刀开果酱罐头，荷包蛋吞咗块入口话好难食，又话阿飞成鸠日带刀喺身，惹是生非。“我唔带刀你哋开到罐头咩？”阿飞系有把刀喺身先至安落，话杀杀邪气都好。
快活时光过得好快，唔知唔觉下午回程时间到。天气风和日丽，阳光明媚，真系好似气象预报讲咁样。村口两边开满色彩鲜艳嘅早春桃花，大家观赏咗一阵原生态嘅乡村景色，集体影咗几张相。坐上返广州嘅班车，阿飞同华仔又系坐前排一，二号位，两人都觉得1988年开年就好兆头，新一年一定有好运行。系车厢度，大家取笑阿飞发开口梦：“对A，对2，大！”阿飞听紧华仔部walkmen，随口就和唱：“点解，点解，点解你哋咁失败。”
今次从化玩，食清平鸡嗰晚每人夹咗50文，返到广州仲剩低130几文。大威提议去中山四路东江饭店食有名嘅东江盐焗鸡，无人有意见，马上就截两部的士去。哩度靠近繁华嘅北京路，到饭店发现二楼摆紧婚宴，地下好似饮早茶咁要等位，一班人喺路边骑楼等咗好耐，阿唐，华仔几个想打退堂鼓，阿飞烂食，几大唔肯走：“几大都唔走，坐咗十几文的士嚟，宜家走咪蚀死？”辞差蛊惑，行入大厅里面左穿右钻，终于被佢认到个同喺夜校读大学嘅同学，总算比较快攞到一围大枱。早上到宜家都未正经食过饭，又等咗半日位，成班人饿到发癫。点咗两个大两个中四碟盐焗鸡，再加上其他九个菜，总共十三个餸，大家惗住可能要浪费了。无惗到个个去咗一日乡下返嚟，胃口状态奇佳，啲盐焗鸡又非常好味道，半个钟风卷残云一扫而光十三个餸。荷包蛋攞咗半打啤酒同阿飞，华仔三个饮，大家讲起临上车前盘锄大弟辞差一人独输100文，辞差话元旦赌钱一直输到宜家，阿荣话最近足足输咗五百几，荷包蛋，华仔打啤牌最差，两个老板都输三，四百。大威赌技同社会经验一样丰富，阿唐牌风同做事一样稳阵，都话输赢出入唔大，讲下讲下大家矛头指向阿飞，就话阿飞赢最多。
荷包蛋将剔紧牙嘅牙签掟向阿飞：“系佢飞头赢嗮啦。”
“系佢，一家独赢。”大威趁机推波助澜：“佢宜家身上着嘅新皮褛都系赢我哋啲钱买返嚟嘅。”
阿荣，华仔同声指正：“掟佢。”所有嘅牙签都飞向阿飞。
“放屁，皮褛系我用年终奖买嗝。”阿飞飞身松人，把口系咁讲，心底却打起密底算盘：“最近因为分公司要分家实行精简机构，把分出余钱借各样名堂赶年底嚟哩日发30文，嗰日发50文，加上赌钱最近连赢，今年总算槽到500文俾老窦攞去银行。”阿飞今年23岁，1分钱都未槽过入银行。记得1980年之前，手上有张兜好多年利是，槽低嘅10文大团结，同班老友成日饮饮食食，甚至夹份去中山路华北饭店食饺子，好耐都使唔完。今时今日500文可以算叫“鸡肋”，讲出嚟可笑。
饭后埋单90文，有剩余攞去嗮相。见到阿荣苦口苦面无精打采，阿飞亦都唔开心：“以后赌钱仲系少玩为好，赢咗大家唔高兴，输咗自己赔唔起。”转念又觉自己多心：“睇样以后再组织出游都怕不易，佢哋个个都似快有女朋友，自己就更无聊。脱产学习已经完结听日要返翻商店上班，又要重新面对单调乏味嘅工作。”不觉有啲愁绪，又有啲苦闷，耳边不禁回荡起客车上朦胧睡意中谭咏麟嘅歌声：
前面有时会只得我，
如果心里闷烦，
唯哼一句旧歌，
哪怕夜冷风凄劲，
未惧前路恨愁多，
让热情在心坎内，
不必伸手给我。
网友评论