仲喺87年嘅时候，阿飞偶尔去下街市，突然发觉好多嘢贵得厉害，直头用触目惊心不为过。买滴多嘢都要上文，特别系水果，轻易唔敢买嚟食。但阿飞嗰时觉得自己单身寡人唔使杞人忧天。打后政府发行50文， 100文面额钞票，阿飞从杞人就变成愁人。货币贬值，物价飞涨，基本上所有涉及人们生活所需日常用品，食物都按倍数上升，政府虽然有补贴，但犹如杯水车薪此不抵彼，严重威胁正常生活开支。特别系退休工人，因为佢哋已经无可能有额外收入来源弥补贬值。老百姓都非常理解计划经济时期商品系低价惠民，政府负责财政分配。宜家经济改革变成自由开放市场，生活波动在所难免，虽然有怨气但未至于牙痛咁声。但有啲现象却令人们气愤，由于监管不力，大量投机商人趁乱哄抬物价，收入与支出嘅悬殊将阿飞哩挺铁饭碗国营职工同时代发展远远拉开距离，学佢话斋：“出粮俾张100文你，你仲要搵几十文找翻俾佢。”阿飞再无籍口唔为将来远虑近忧。
公司为咗适应当前改革形势，响应市场经济政策，决定将部分蚀钱嘅，微利嘅，长期经营困难店铺实行集体租赁承包，阿飞黄沙间商店系第一批试点。集体租赁承包同宜家嘅商店独立核算自负盈亏经营，区别只在于对公司，完全一刀切无嗮债务牵连，但对于商店员工仍然系大锅饭，人人系老板，个个有股份。“人心难齐，内讧迟早。”阿飞认为，再加上仲系陈大经理抓庄，虽然唔怕佢搞嘢，但咁就无瘾啦，日日上班就准备搵交哎。阿飞心灰意冷想另谋出路，动咗自动辞职嘅念头。惗下就简单，一无技能，二无学识，前路茫茫出到社会都唔知能做乜？对于陷入当前两难困局，阿飞开始反省自认嘅聪明，自以为是嘅学问。发现竟然预计唔到大面额货币一出，买条底裤都贵过以前做套凡立丁。附近啲个体士多老板，个样成旧番薯咁，宜家啲存货升嗮价，发到红油满面系咁流。自己睇咁多鲁迅有咩用？啱仲计划睇埋巴金《家春秋》三部曲，只系睇咗一本就觉得无法同鲁迅相提，毫无艺术可言，再无兴趣心情睇落去。
人生在世，好丑命生成。运却因时势造化环境际遇，命运会有所改变。80年代喺国家哩个经济大改革时期，阿飞嘅人生点可能无受到冲击，点可能一成不变，点可能逃得过命运嘅愚弄！
哩晚又喺高基街口食美味啫啫黄鳝煲，白灼牛百叶，清甜水蛇粥。天气闷热，个个食到汗流浃背。阿飞讲起商店将要承包，经理食回扣，一个月连公司补贴90文收入都无，承包后公司补贴无埋更死。大威俾碗粥热到大汗淋漓，肥油满身：“我话你不如出嚟考个车牌，去我公司度开的士，我度啲司机每个月闲闲哋都搵六，七百文，勤力嗰啲搵成千文个月。”
阿飞听见六，七百只眼就开始放光，一千嘅时候已经光芒万丈。
“趁宜家仲后生，你先廿几岁仔，出嚟博下。”大威继续讲。
阿飞早就羡慕时下好多年轻人腰间驼部 BB 机，好似荷包蛋，辞差哋开住部摩托车。哩两件简直系时下杰出青年嘅标配。不过哩个杰出青年唔便宜， BB 机要成千六七文部，摩托车要天文数字更加唔敢奢望 。宜家想到可能搵到每个月成千文收入，心头架起咗七色彩虹：“考个牌要几钱？”
发梦无咁早，仲系返到实际问题先 。“宜家我哋公司驾校1700文，我上年啱考完，嚟我哋公司学车，毕业初期实习牌就可以开的士，全市就两间公司可以，一间我哋市汽，一间系市交通。”大威介绍。广州市车管所驾驶证管理规定：初学者毕业第一年持实习驾驶证，一年后无发生重大交通事故先发正式驾驶证。阿飞听见 1700 文吓一跳，乜嘢光都无嗮，两眼净系想发黑。“你仲要有待业证，我哋国营公司一定要有哩两个证先招人。”
阿飞10岁嘅时候喺 青年路仲成日见到马车，同啲同学攞条红领巾出嚟，听大人话如果可以引到条马柒长到点地，只马就会死嗝啦，但未成功过，多数系未见马柒出嚟就俾赶马人凶走嗮。拖拉机拉沙石嚟光明路，佢哋会趁驾驶人行开上去 乱摱乱摇 摆弄， 返过几个月中学为赶时间喺向阳路攀爬过过路大货车。以上就系阿飞对车嘅全部认识， 汽车对于阿飞嚟讲同宇宙飞船差唔多咁陌生，神秘。要探索宇宙真唔系咁容易，但大威起码为佢指出咗打开神秘之门嘅方位。
几日之后，喺阿庆过几间屋，见到小学同学老道，老懵两个喺佢哋屋企门口倾计，阿飞埋去打听有无人了解有边啲地方学车。真系无巧不成书，老道原来啱啱学完车考到驾驶证。
老道中等身材。读书嘅时候安分守己，个人忠厚老实， 佢哋哩代读到高中毕业嘅唔多，老道高中毕业。适逢经济改革，旅业兴起，广州火车站旁边嘅“乐苑酒店”招客房服务员，老道报名入咗去做。老道个人好整蛊做怪，中意搞搞震，但搞亲嘢都损人不利己，大家话佢系恶人谷嘅白开心。 酒店前台接待员都系女仔，深夜班嘅时候，老道专系去吓佢哋。更深人静，佢用白纸挖两个眼洞，用墨水画个鬼样糍喺面上，无声无色走到前台柜外拍醒瞓着嘅女服务员，三更半夜个个都被佢吓到半死，喊住逃跑。佢就悄无声息消失喺楼层，隔一阵诈诈帝出嚟问咩事？搞到乐苑人人传闹鬼。哩一晚，老道又故伎重演。新嚟嘅女服务员茹女系个男仔头，半夜见鬼佢先先都魂飞魄散个心离咗离，佢无喊，呆咗一呆顺手攞起台面玻璃杯照鬼头就掟过去，老道啱啱转身想走，“卟”一声闷响正中佢后脑枕，即时鲜血直流。老道用生草药揞住伤口返到光明路，从此多咗个花名：大哒喇。虽然受咗皮肉之苦，但却得到茹女嘅同情心，两个人恋爱上了。
自从广东有咗 “深圳”，“珠海”两个经济特区，广州火车站流花地区周边一带地方都兴旺发达起嚟。“乐苑酒店”更加系客似云来，酒店前后有“广涛阁”，“碧涛阁”两间桑拿，都系新兴嘅高档消费场所。各色人等更加系特别多，啯 啲高大雪白嘅东北女人，经常入住酒店，问老道佢哋有无香港 ， 台湾客商介绍，有嘅话可以俾小费。同时，有大量出差来往嘅客人入住酒店，有需要嘅亦问有无女人？同样可以俾介绍费。老道份人热情，好助人为乐。同时亦都体会到宜家社会：时间就是金钱，效率就是生命！有一日，老道帮个大连客人搭上咗个女人，客人俾咗20文小费佢。客人当晚饮多酒，一直未能完事。女人觉得吃亏，嘈住要收钱走人，客人唔同意，拉拉扯扯起嚟，一齐拉嗮去 派出所，供出咗淫媒老道。老道被公安控告介绍卖淫，由于系初犯被判处劳动改造半年，最后仲被当社会新闻登上日报头版。出嚟之后被 酒店开除无埋份工， 佢就去市交通集团公司培训驾校学车，刚刚考完毕业等紧开实习的士车。
既然同学都惗住开的士，阿飞真正开始计算行动步骤：首先辞咗份工，然后去街道办个待业证，再去驾校报名考个驾驶证，以后托关系去开的士。咁计咗一计时间过程，起码无一两年转唔到行，又非常气馁。而且自己无咁多钱学车，待业证唔知要搞几耐先会有？大威啲关系唔知牢固唔牢固？学完车无的士开又点办？仲有至关紧要哩两年无嘢做点过？
网友评论