吾出生于20世纪70年代末期，拨大家称之为“70”后，是土生土长个上海人搭浦东人。至少勒拉三十年前头、勒拉各条大街小巷、马路边浪向搭弄堂里向，从早到夜，辰光是早浪向六七点左右，一直要到下半日四五点钟左右，就会时覅时个飘出唻一股香味道，迭股香味道是用覅着去多解释，因为凡是一些懂经个喫客侪晓得，迭股香味道眼板数就是从油墩子摊头里向金黄焦香个油墩子散发出唻个。
勒拉三十年前头、勒拉掰搿辰光、勒拉各条大街小巷、马路边浪向搭弄堂里向，吾伲还常庄性会得看到迭能一幕场景唻个，迭幕场景就是－－勒拉一座大个煤球炉子个上头，支起一口大个铁锅子，正勒拉做油墩子迭种邪气传统个美食小喫。勒拉一口既沸腾又热气腾腾个油锅里向，几只刚刚下锅个油墩子正勒拉覅停个翻滚着，往往勒拉铁锅子个旁边，还配有一副铁架子，勒拉铁架子个上头还沥着油水唻，已出锅个油墩子，整整齐齐个排列勒拉一道，可以讲架子上侪是挤得满满当当个。依据吾所查询到关于上海老底子各种历史方面个记载，像油墩子迭种类型个传统美食小喫，少讲至少已经勒拉上海滩浪向存在将近有百年个历史，绝对深受上海市民个欢喜，是属于典型个平民美食小喫，对于唻沪旅游个客人更是覅容错过个上海特色美味。
只拨过，勒拉今朝仔个上海滩浪向、勒拉各条大街小巷搭弄堂里向，已经很少能够去看到油墩子摊头，会得做油墩子个人家搭饮食店，同样是变得越唻越少，有某些饮食店还勒拉恢复老上海个传统美食，勒拉外头还会得打出横幅，讲道：“老上海经典小喫油墩子。”
今朝仔邪气有可能去喫油墩子个人，也是逐渐个变得越唻越少，毕竟“油墩子”迭样美食小喫，要去用忒交关多个油拨油炸出唻个，医生也一直勒拉宣传讲，多喫各种油炸一类个食品搭小喫以后，对于个人个身心健康是邪气覅好个。当代上海人只为能够始终去保持身心健康，已经覅大欢喜去喫各种油炸一类个食品搭小喫，侪是因为喫交关多个闲话，对个人身心健康绝对是覅好个一桩事体哦，上海人还认为，凡是对于自家身心健康覅好个各种事体，就要尽量少去做。
等到吾也长大成人以后，至少岁数要勒拉二三十岁个辰光，侪让吾晓得迭能个一桩事体，迭桩事体就是－－“油墩子”迭样美食并覅是属于上海人独有个一种街头小喫，就连江浙两省、天津、上饶、湖北等地方，同样也是拥有“油墩子”迭样美食小喫个。据“传说”讲，江苏扬州搭苏州、浙江杭州，像迭三块地方侪是勒拉争夺“油墩子”个原籍，侪勒拉号称自家个油墩子，既是顶顶正宗个美食小喫唻，又绝对是发源地哦，其他地方出唻个“油墩子”通通侪是冒牌货，覅是邪气正宗个，吾伲绝对要一致对外去打一个假，俗话讲得好，覅争馒头争口气，大家只为争夺发源地，侪闹得有一眼眼个覅可开交！
嘎么，“油墩子”当中个“墩”字，伊又是啥个唻路搭意思呢？！“墩”字勒拉辞书里向，拨迭个词眼去定义为：“建筑物基础”。勒拉建筑学上头唻讲伐，拨柱子搭地面相互结合勒一道个部分，侪是叫作“柱基”个。中西古典建筑个柱基，往往侪是采用类似于象棋状个石料制作而成，邪气通俗个一种讲法就是“石墩子”。像“油墩子”，伊个形状就好像是“石墩子”一样，所以就去叫做迭个名字哦！
关于像“油墩子”迭能个一道美食小吃，伊还是拥有另外个一个典故搭历史传说。勒拉吾伲国家历史浪向个清朝时期，乾隆皇帝个一生有下过六趟江南，其中一趟仔乾隆皇帝乘舟沿运河南下，遭遇到大雾天气，伊只好避难勒拉苏州黎里镇契湖一座古寺里向。迭个辰光伊饥肠辘辘肚皮饿，就向方丈讨要喫个么事。可是寺庙当中个日脚过得是邪气困难个，根本就呒没啥个好么事搭美食供奉拨乾隆皇帝喫喫哦，方丈勒拉情急之下，只好急中生智，用现成个豆沙包裹勒拉糯米粉里向，再搓揉成扁圆形后放勒拉油锅里油氽氽一下，等氽熟以后就请乾隆品尝一下。乾隆皇帝喫过以后大加赞赏，就去问方丈：“迭样食物到底是叫啥个名字啊？！”方丈竟然一时头浪呒晓得哪能去回答乾隆皇帝侪是好，乾隆皇帝看到方丈邪气为难个表情，晓得伊呒晓得哪能回答好，就再也覅去为难方丈。乾隆皇帝看到迭样食物个样子是圆溜溜个、黄澄澄个、扁塌塌个，活脱似像寺庙大殿中拜佛讲经时用个蒲墩，乾隆皇帝讲：“干脆就叫迭样食物为‘油墩子’吧。”……
上海人又是哪能唻做“油墩子”个呢？！伊个做法就是－－勒拉通常情况下头唻讲伐，常庄性能够让吾伲看到个情况就是－－面粉加各种颜色个萝卜丝，其他一样么事啊是呒没个。勒拉吾自家还呒没去搞清爽迭样食物小喫名称个前头，总归认为叫“萝卜丝饼”侪是属于顶顶正确个答案搭讲法，“油墩子”迭种叫法绝对是覅正确个，勒拉某些老一辈个老上海人个眼睛里向，还勒拉某些“老克勒”当中，就会得纠正吾个迭种讲法，迭些人就会讲啥个“萝卜丝饼”就是“油墩子”，上海人侪是叫“油墩子”，而覅是叫作“萝卜丝饼”个！
【备注：像“老克勒”是沪语方言闲话，伊个意思就是讲：中年、勒拉洋行工作、高薪、职业安全、有见识、有教养个职业人士。】
吾还想要去讲个闲话就是－－勒拉做“油墩子”个前头，操作个人事先要去调和好面糊个，上海人做油墩子所要使用个面糊，基本浪向侪采用小麦面粉去做个，而绝对覅大会采用糯米粉去做个，也只有勒油煎糯米团子个辰光，侪会去采用糯米粉个。要是讲做油墩子个人，覅是采用小麦面粉，而是去采用糯米粉，侪是属于覅正宗个，就会拨“懂经”个人讲道，做个人属于“洋盘”一只啥个侪是覅懂个！
【备注：勒上段文字当中，像“懂经”是沪语方言闲话，伊个意思就是讲：老资格、对某一类人事物情邪气精通。像“洋盘”也是沪语方言闲话，伊个意思是讲：对于某些人事物情缺乏经验个人。】
吾依旧还能清爽个去记得迭能个一桩事体唻哦，勒拉老底子，还勒拉顶早个辰光，做油墩子所使用个工具，虽讲是一把勺子，迭把勺子却是由铁皮制作而成个，到今早仔则改用不锈钢类型个勺子。
每趟仔勒拉做油墩子个辰光，事先就要去舀一勺子面糊唻打一个底，接下唻就是要放葱花搭萝卜丝，末脚个一个步骤就是－－再去舀一勺子面糊拨里向个馅料全部覆盖并封牢仔，随后就再拨伊放到油镬里向进行氽炸。勒拉勺子个手柄末端还拨拗成为一个弯形个钩子，勒拉勺子下到油镬里向个辰光，制作者就会拨弯钩勾勒拉镬沿，腾出手唻再去做另外一只。要如此反复去做三四趟，直到拨所有个空勺全部去用光。当末脚一勺下镬个辰光，第一勺子应该就可以去成型。
勒拉操作个全过程当中，有一个步骤也同样是覅好去省略忒个，迭个就是－－底朝天就再去翻转一下，油墩子自然而然就会滑入到油镬当中去，迭个过程就好像搭一个游泳运动员是一式势样个，从原先个“蛙泳动作”，就转变成为“仰泳动作”。紧接着，那些熟练个制作者只要用筷子或长钳轻轻敲打油墩子个一侧，油墩子就仿佛游完伊个泳道、碰一下池壁，再唻一个翻滚，继续伊个“沸腾生活”。末脚，伊拉还是要拨一只又一只钳到铁丝网上头去漏油，拨油去沥干。
还有一点也同样是需要去讲清爽个，要么覅去制作油墩子，一旦做起油墩子以后，是需要制作者勤加照看、去覅停个翻腾，是一刻也覅能去停歇个，而且动作是邪气熟练连贯，从开始一直到油墩子成熟成型，动作可以讲是一气呵成个，就连得片刻休息个辰光也是呒没个。否则呒没弄好，制作者想要稍许开一下小差去停一歇歇，油墩子是邪气容易会得变糊变焦变黑忒，勿单单是卖相呒没，喫起唻味道也是覅大灵光个。虽然讲起唻一个人也是可以去做油墩子个，只拨过，勒拉通常情况下头，勒拉掰搿辰光，油墩子制作者基本浪向是两个人，迭两个人多数是一男一女，而且还以夫妻搭档为主个，大家轮流交换去做，迭能家去做侪是拥有一个好处个，就覅会得觉着“沙度”。
【备注：像“沙度”是沪语方言闲话，意思是讲劳累吃力。】
对于那些老一辈个老上海人唻讲伐，侪是拥有迭能个一种讲法个，迭种讲法就是－－还邪气欢喜拨那些“喫货”侪是叫作“馋佬胚”，同样是勒拉迭个辰光里向，但凡是一些邪气爱好喫喫油墩子个馋佬胚们，尽管晓得油墩子已经氽好并炸熟，还尽管讲，需要拨油墩子上头个油水去沥干，拨过勒拉馋老胚个眼睛里向，“老里八早”就“定洋洋”盯牢仔属于自家个油墩子覅肯离开视线，可能还会去流口水，拨口水往肚皮里向咽下去，看得唻就连馋吐水啊要去哒哒滴！……
【备注：像“馋佬胚”是属于一个沪语方言闲话，伊个意思就是勒讲：就是属于一个贪吃鬼；像“老里八早”也同样是属于一个沪语方言闲话，伊个意思就是勒讲：勒老早个辰光；像“定洋洋”也是属于沪语方言闲话哦，伊个意思就是勒拉形容一个人呆呆个样子。】
今早仔，某些欢喜上海滩浪向各种老底子美食个老饕客们就会讲：“现在仔做油墩子个摊贩，绝对是覅大正宗已经是走样，既只为去节约各种成本，又可以去省一眼力气搭事体，常庄性会得去制作‘简化版个油墩子’，会将萝卜丝搭面糊搅拌均匀以后，就一次性放入锅内煎炸，覅是反复氽炸个，馅料里向也只有萝卜丝，覅再去用价钿较贵个河虾等食材，有一眼偷工减料！”……吾也是觉着有眼奇怪，从小到大喫油墩子喫到今早，从唻呒没喫过带有河虾食材个油墩子。
勒拉吾所在个城市上海，勒拉上海电视台，就有好几档专门介绍上海以及全国各地美食类个节目。比方讲：《淘最上海》《疯狂实验室》《星旅途》《人气美食》……《人气美食》开办勒拉2007年，迭档节目主要是介绍上海滩浪向个各种美食、人气小店搭烹饪厨艺……
吾曾经勒拉《人气美食》节目当中看到过一集，介绍过上海市松江区个人气美食油墩子，还成为上海市网红油墩子。迭个地区个油墩子，搭上海市其他地区是覅大一样个，所看到个所谓个油墩子，像油煎糯米团子或塌饼，而且豆沙、鲜肉、咸菜等好去任意挑选个，就是没看到、或者讲极少看到萝卜丝馅。所采用个就是鲜肉－－将已经烧制好个新鲜五花肉剁成肉糜，再辅以“盐”“葱姜”搭“料酒”唻吊吊鲜味道、去解除忒一些腥味道。包裹馅料所采用个粉侪是糯米粉，而覅是去用小麦面粉哦，先用糯米粉加一定量个水，揉搓以后再和成面团，末脚填入搅拌均匀个肉馅，揪出一小团，然后放勒拉锅子里煎炸。凡去松江地区白相个游客，侪会去买唻尝尝味道喫一喫个。
油墩子迭样小喫，吾同样也是邪气欢喜去喫个，只拨过，勒拉吾读小学一年级到初中一年级个辰光，绝对是喫覅着个，侪是因为掰搿辰光，吾所居住个地区，是呒没做各种小喫个饮食店，要喫油墩子个辰光，只有每趟仔到外公倪根生外婆张榴妹所居住个地区侪有得做、侪可以去喫喫个。吾曾经个同事陈建敏老师傅也曾讲过迭能一句闲话个，伊讲道：“吾曾经勒拉侬居住地区工作过，少讲顶少也要有近十年辰光，侬居住区域是呒啥个早饭搭点心好买个，油墩子、包脚布等早点心绝对是喫覅着个，只有吾所居住个地区侪会有个！”……
自从吾刚刚开始“做生活”以后，【备注：“做生活”是沪语方言闲话，伊个意思是勒讲：做工作。】还自从吾懂得迭能一桩事体，要是个人常庄去喫喫各种油炸类食品，对于身心健康是覅好个，虽然讲也邪气欢喜去喫油墩子个，自家只好是千年难般去喫喫油墩子啊！
既然今早仔吾讲到油墩子迭样美食小喫，就覅能覅去讲讲吾奶末头阿姨倪金凤个尼子沈健。吾至今为止依旧还能够清爽个去记得迭能一桩事体唻哦，表弟也是同样欢喜喫油墩子个，勒拉伊十二三岁个辰光，也是勒拉伊长发头浪辰光，有一天吾伲侪勒拉尼姨妈倪榴英屋里向搞家庭大聚会，沈健伊虽讲已经是喫过中饭，等到下半日大约摸是一到两点钟个辰光，伊觉着肚皮邪气饥饿，还拨尼姨妈屋里附近做油墩子个摊位吸引牢，就硬劲要买唻喫喫，勒拉掰搿辰光油墩子是一块洋钿一只，伊一口气喫十一只，而且铜钿还是由尼姨妈倪榴英支付个，等到伊全部喫好以后，整个人侪是拨噎住了，就连夜饭侪是喫覅下去，吾伲叫伊去喫夜饭，伊无论如何也是覅肯去喫哦。【备注：当时尼姨妈倪榴英所居住个地区叫做“老三井”，抗战胜利以后还叫过“胜利镇”个，今早仔已经拨拆迁面貌全无，勒拉掰搿辰光，一踏出伊拉屋里个门口就是马路，勒拉整条马路浪向，侪是有各式各样个摊位。比方讲：就有水果摊头、流动早点（点心）摊头、河鲜搭海鲜摊头……】
吾之所以要去撰写迭篇文章，勒拉自家个内心深处，并覅是去要怀念一眼啥个各类人事物情，而是讲，虽然勒拉今早仔，还勒拉某些饮食店里向，照样是有买卖油墩子个，只拨过，辰光过三十多年以后，当吾勒拉蓦然回首老底子各类人事物情个辰光，辣末生头发觉，曾经是上海滩浪向，独有个一道风景线、独有个一点点市井气息，正勒拉慢慢较拨消亡忒，勒拉曾经个上海滩浪向，还勒拉各条弄堂里向搭各条马路浪向，既有阳春白雪，又有下里巴人，阳春白雪搭下里巴人，几乎可以讲是齐平个，勒拉同一道风景线上头也是齐头并进个，今朝仔个上海迭座城市，只看到阳春白雪，反倒是下里巴人呒没，市民搭市井气息亦变得越走越远，内心总归觉着好像少忒一样么事……
【备注：①：文章为作者原创；②：各种油墩子侪是唻源于网络上头；③：万分感谢原创图片。】
杜老倌侠客居（陆伟）写于2020年01月10日礼拜五夜里向
网友评论