11月，广州市喺新建成嘅天河体育中心举办第六届全国体育运动会。天公不作美，大雨如注，好在开幕式表演仲能够照常进行，照样缤纷璀璨，精彩纷呈，渐渐老龙王都只好偃旗息鼓收雨。好笑嘅系开幕前媒体报道天气：“开幕当天一定金秋气爽，风和日丽。”就连开幕后嘅晚报都仲写好天气九成九，使人怀疑报纸除咗个日期，其他内容嘅真实性。
日子好快，不觉到咗年底。12月27日晚，荷包蛋，大威，辞差，阿荣，阿飞，阿唐六个为食鬼，嚟到上下九新开张嘅清平饭店食骨都有味嘅清平鸡。大家讲翻起闸坡，烂玩嘅阿飞顺势提议元旦出去玩。荷包蛋最近有拖拍，大威同佢有私密计斟，阿唐亚洲汽水厂份工好忙，一个人要负责黄埔条铁路线，带车装火车柜将汽水运往全国各地，要跟车跟货跟火车车皮。佢哋都唔系几想去。食咗两只清平鸡啦，提起咗几次，阿飞落足嗮嘴头，硬系无人响应。辞差话佢搵到咸湿录像带，可以带埋录像机去开房一齐睇，大家即刻就精神焕发，人人开始愿意夹钱去玩。目的地：从化温泉一日游。辞差个人比阿飞仲烂玩，阿飞感觉到宜家各人有各人心思。
元旦一早瞓醒，乌云满天冷风阵阵似乎要变天，但天气预报今天系阳光明媚嘅节日。阿唐因为早上仲要带车入站，全部人迁就佢买咗下昼2点出发嘅车票。阿飞就慢慢执拾简单行装，食早餐，睇电视，然后用煤炉煲水洗头。哩个时候华仔，阿荣嚟到，话荷包蛋，大威喺五羊城酒楼饮茶密斟，要唔要过去。阿飞话要吹头叫佢两个去先，吩咐顺便买啲面包果酱返嚟，听讲从化乡下好荒凉半夜无地方买嘢食。阿飞吹干头搽上摩丝发胶，着条牛仔裤，披件新皮衣。兴冲冲赶去人民路五羊城酒楼，喺门口撞到辞差着住对拖鞋，一身邋遢旧衫裤，孭住个大水桶袋，里面有录像带录像机，无所谓谓咁鸠样嚟到。
阿飞话：“叼，去玩做咩着成咁嘅。”
“唔得咩？去从化之嘛，我上华山都系着拖鞋。”辞差有文化，专一与众不同，性格出位。阿飞反而觉得自己隆重过头。酒楼早茶已经收市，荷包蛋，大威埋单落嚟，要返各自屋企执行李。阿飞只好同辞差返光明路屋企，正好华仔，阿荣买咗面包果酱返嚟。成班人本来要去荷包蛋档口集合，听到噙日佢两兄弟为老窦要再娶老婆嘈到反嗮，就过阿飞屋企一边玩“锄大弟”一边等阿唐。大威买埋影相菲林嚟到，荷包蛋跟住佢后面上嚟余怒未消，口中念念有词：“正老懵懂。”“正老咸虫。”大家趁势起哄。
阿唐嚟到嘅时候已经过中午，阿飞叫佢帮手装菲林，要同大佬4岁个仔影几张相先，阿唐影完抱起侄仔又要影。大家都话肚饿，商量先去流花宾馆食饭，啯度靠近车站。但成班人“锄”到兴嗮，无个愿意动身。直到辞差又出千，偷已经出过嘅大柄2，被当场断正，撒赖皮发生争吵，众人一哄而散，纷纷夺路狂奔。七个人分坐两部的士去流花宾馆，好快就揾到位，匆匆忙忙写菜叫饭。阿飞赢咗钱抢住埋咗单44文。食完饭有人要去厕所，有啲人急住去赶车，一下子走散嗮。好在，都系出惯门嘅本地鸡，陆陆续续系部车已经开动嘅时候全部返到齐，就剩个辞差。部车唔理大家喝叫，唔等人开郁啦，先见只辞差踢住对拖鞋出现喺出口。
汽车经环市路入19路军坟场出沙河行广从公路去。阿飞生活偏安旧城一角，轨迹好少离开小半西关地。宜家同华仔坐车头排一，二号座位，沿路从车窗外望出去，突然发觉广州高楼大厦多得惊人。自从1979年“羊城贺岁万家欢”，广州家家都竖起鱼骨天线收香港电视，宜家到处高楼林立，鱼骨天线都收唔到香港电视,只能用短波收音机听下香港商业电台“18楼C座”。文革以前广州最高楼系海珠广场广州宾馆嘅27层，宜家新落成嘅33层白云宾馆创咗新纪录。汽车啱啱求先经过环市路，见路旁一工地标语大字：“即将建成63层大厦”云云。阿飞觉得高楼大夏起得太多太快，而城市嘅烂尾楼咁多，心中存疑：政府点搞咖？有无人住咖？
车过凌云渡，开始见到两旁茂盛嘅树木一望无边。树木多系两，三米高，好似把遮一样伞开，横桠短枝密集，墨绿色茂密得让人好舒心，华仔话哩啲系荔枝树。“哗，咁有好多荔枝啵。”阿飞惊叹。华仔去过二年增城家具厂打工，啯间工厂旁边系“增城镇招待所”，里面有一棵粗大正宗石唊龙眼，一棵乌榄，后院仲有一大个荔枝园。佢哋落深夜班就偷偷翻墙入去上树摘，6，7月就有荔枝摘，8月可以食到龙眼，到到10月份乌榄又熟了。华仔话啯啲乌榄摘咗落嚟用水煲熟，撒上砂糖好好食。有趣得让阿飞内心对乡村生活有无限向往。
讲话间，离远见繁花绿树掩映住鲜黄琉璃瓦房屋，从化温泉到了。温泉旅行社最大间只有六人房，加多一个要俾多5文。阿飞独自去村口牌坊附近行下，过一阵再入嚟，咁就㗂返5文加床费。入到房一班人咩都唔做，嘈住要睇咸带。一番扰攘拉线插制，录像带放入富丽录像机，咸湿录像正式隆重播放。一饼系黑白带，只有十几廿分钟。一个番鬼女人同一个番鬼佬一埋牙就除衫除裤开片，饼带好花，净系听到条鬼婆不住浪声呻吟：“feel so good”。大家都睇得无咩瘾，第二饼叫《海盗》，香港三级片，讲一班海盗捉女人强奸。佢哋一班杰出青年人睇到心理沸腾，生理昂扬。个个长见识之余仲识咗讲英文：“feel so good”。人人意犹未尽，阿唐马上有需求，问：“哩度唔知有无鸡叫呢？”
网友评论