钩鼻佬同学都系明兴里小学一个人物。佢屋企唔知咩原因整个读书时期都喺搬迁中度过，嗰时候经济唔发达，人民生活基本安定，好少见到有人家随便搬屋。钩鼻佬原先都住喺光明路，靠棵刀豆树左边，同阿飞两家只隔一间街道印刷厂，阿飞上天棚放纸鹞偶尔都会爬到过佢窗口。佢老窦早死，从细就喺单亲家庭长大，有两个家姐一个哥。读咗一年小学，全家搬咗去惠福路住，到到升初中之后又搬咗去松桂路。
钩鼻佬成日搬屋但思想固执，观念陈旧，凡事只相信自己嘅睇法，唔轻易听得入别人意见。身上有革命年月教育嘅爱憎分明英雄本色，同阿飞一样中意睇古典演义小说，够胆同人打交，而且话动手就出手。中学毕业入咗光明路街道漂染厂，可能十几年从细不停搬屋嘅动荡生活，形成强烈固执嘅安乐愿望，钩鼻佬参加工作之后就感到哩世人如愿足矣，向往古贤之士闲云野鹤写意人生，开始匿响松桂路内街深处屋企唔出嚟，喺破旧砖木老屋天井摆楚河汉界，研究车马士象炮，希期有日能向世界棋王杨官麟发起攻击。十几岁人就玩雀笼，养画眉，从此不问世事，消失咗一段时间。
过咗几年，唔知系咪有日食错草龙当晚饭？或者系间老屋破败，漏水更兼连夜雨？而且渐渐听鸟炒耳，凡系天黑心烦。实质系人到青春期，心理有变化，生理有需求。钩鼻佬突然有日一觉醒嚟将画眉上天，放相思归林。将平日爱如己命几个雀笼变现卖嗮钱，镀身做咗套深蓝色凡立丁中山装，置对漆黑发呤包头警用皮凉鞋，就话要出关：去学踩雪屐。阿飞知道嗤之以鼻：“想学成我离心独劈，混转乾坤？好！难啦！”等住三日兴头一过就讲佢笑话。钩鼻佬果然系革命教育武装起嚟嘅人，一不怕死二不怕苦，三不怕老虎咬大髀。梗硬用咗三晚喺文化公园雪屐场跌到头蹦额裂，鼻青脸肿。硬系溜出旋风飞舞，腾挪闪避，身形矫健，姿势优美。阿飞都暗暗喝彩。钩鼻佬学识踩屐后晚晚放工就流连屐场，群埋阿飞班兄弟，大队长班死党。佢手瓜天生神力，曾经当街倒立打竖冲半日纹丝不动，喺屐场同人打交，以一对几全无惧色。
有日中午，几个同学经过光明路街道印刷厂门口，几个青工喺路边水龙头度洗饭兜，洗手，其中一个摆咗只梅花表喺地，其余嘅开玩笑大哎：“哗，哩只表边个咖？有无人要啊？。”钩鼻佬真系埋去一伸手执起只手表：“无人认，我要。”边讲边戴起只梅花表行咗去，同行嘅阿飞哋都好愕然，几个青工更加反应唔过嚟，好耐先识得去追，钩鼻佬都快脆转入“咸家巷”唔见人啦，几个青工团团围实佢：“你做咩执我只表？”钩鼻佬一啲都唔惊青：“你嘅咩？你哋话无人嘅我先执起嚟啫。”青工攞返只表，见佢哋人多，阿飞，大队长几个清一色四个袋凡立丁中山装，塑胶棍仔鞋军阀仔装束，就费事争执离去。大家却被钩鼻佬啲出其不意笑到碌地。
工人俱乐部“祥发餐馆”有个服务员叫阿香，从化乡下人，生得娇小可人，做事麻利，性格爽朗，好得附近街坊喜爱，搞到餐厅好生意客似云来。钩鼻佬系其中一个云来之客，佢间漂染厂喺荷包蛋五金铺斜对面咸家巷口，佢经常嚟食饭，经历过声色场所咁嘅雪屐场，钩鼻佬中意咗阿香嘅平静踏实。不过，人哋阿香要嘅系王子与公主般浪漫爱情，钩鼻佬啲古老石山连做马僮都不配。阿香好多人追，餐厅厨房个鸡仔，整得一手好鸡，高大英俊，最重要系口甜舌滑，识得氹女仔，阿香好快就俾佢氹上手。王子同公主浪漫过后就系柴米油盐，哎交嘈吵，阿香受唔了，两个人分咗手。
连元里胡佬杰都成日嚟，佢人如其名吹葫芦吹到无嗮谱，讲亲都系坦克车轮胎，飞机倒后镜，吹晕咗阿香。两个人行埋之后，成日问阿香借钱过荷包蛋档口赌钱，同猪朋狗友去外面鬼混，使晒阿香嚟广州搵嘅钱。阿香吃咗亏，对佢避之则吉。胡佬杰周围问人借钱，欠落周身赌债。佢经常嚟餐厅纠缠阿香，拍台拍凳捣乱：“行街睇戏你就识去，问你攞滴多钱你就阿姿阿阻。”仲想郁手打阿香。
钩鼻佬哩个马僮，固执陈旧，认定咗中意嘅人就唔容易放弃，佢一直默默守候喺公主身边就系为等有机会英雄救美。胡佬杰胆敢放肆？被钩鼻佬铁拳劈面打个半死，揪住心口要佢保证以后唔踏入餐厅半步。胡佬杰身娇肉贵，毫无还拖之力，被人打到头破血流逃返屋企，以后真系经过都只由对面行，阿飞知道拍手称快。钩鼻佬嘅坚持终于有回报，马僮仗义救主感动到阿香，佢两个最近结咗婚，一齐离开咗光明路过河南街市开档做生意，初头贩卖猪肉，最近转咗做卖毛鸡。
1988年过去了。哩一年阿飞果然好运，所有计划打算都基本实现或逐步实现：辞咗份阿爷工，搵到新工作，交咗钱报名学开车，槽到些小钱，一切都向美好迈进。1989年快将过年，街头行过已经见到有人运载黄灿灿过节金桔，争妍竞开嘅年花。不过阿飞今年再见唔到每年春节前，宝华路，第十甫街头巷尾人头拥拥嘅繁忙喜庆景象，黄沙码头花农从芳村坐船运鲜花过江情景。
荷包蛋拍拖后，五金铺赌档基本歇业，成班烂赌二之间都少咗来往。过年前有一晚，深夜将近凌晨，荷包蛋过嚟搵阿飞，面色好难睇：“你咪有把大号猎刀嗝，借我一阵。”
阿飞返房搵出把大号折叠刀俾佢：“你无事啊嘛，使唔使搵齐人帮手啊？”
“唔使。”荷包蛋唔愿意多讲，袋咗把刀，就消失喺光明路嘅黑暗里。
过两晚，荷包蛋过嚟俾返把刀阿飞，神色轻松，面上洋溢住愉快，睇嚟问题解决嗮。后嚟听讲系女友嘅前男友带人嚟骚扰佢，三番几次差啲动起手。嗰晚荷包蛋靠住阿飞把刀，一个打三个，如果唔系女友家欣博命拉住佢，实要斩亲人着草。之后，家欣搵埋前男友同荷包蛋出嚟三口六面讲清楚关系，事情得到完满解决。
荷包蛋除咗赌无其他兴趣，佢女朋友近墨者黑都赌埋一份，尤其嗜好打麻雀，佢两个又真系臭盎出丑草沆瀣一气。除夕夜，好艰难先约到照往常岁晚聚赌，阿荣，阿唐无嚟，阿飞感觉到明年一定系自己一个人孤独过年了。连楼下头房士多店玲姐都话好耐唔见到佢哋一大班人喺条街上坐三轮车，踎树脚边喧哗嘈闭。过年酒店出花红，阿飞想搵老道同茹女饮餐茶讲声多谢。喺自己最需要帮助嘅时候得到同学嘅援手，阿飞深深感到落魄嘅人得到一点暖流系多么嘅可贵，嗰个人可能籍此就冲出困境逃向生天。
老道去咗交通集团开的士，啲实习的士全部都系已经过嗮行驶期走私入广州嘅日本车，残旧不堪，开咗一个月出唔到一个礼拜车，又无关系换部好车，无办法做落去。最近喺茹女屋企帮助下买咗部0.6小货车，过年前后忙个不停，约唔到佢两个一齐。
过年后，商店旧工友阿国嚟坐。佢辞咗工后亦想去花园酒店做，阿飞应承留意到酒店招工就通知佢，并提议一齐去英姐屋企拜年。英姐好客气，第日即刻上门送嚟一大袋精美过年礼品点心，仲千叮嘱万吩咐要阿飞记得经常通电话。见英姐关怀如昔，阿飞又感到烦恼，胡思乱想咗一轮。
网友评论