阿庆结婚后又到荷包蛋老窦生日，假座五羊城酒楼大排筵席，其中一围系荷包蛋成班老友。阿唐果然搬走后无嚟到，尤榄通知唔到外其他人基本到齐。荷包蛋个女朋友家欣，大威个女朋友家文都同一桌，搞到大家斯文嗮，又兴奋莫名逞强斗酒。将当晚所有酒水一扫而空，包括夹钱买嚟送世伯贺寿嘅两支竹叶青，两支九江双蒸，两支金奖白兰地饮清光。好似大头民后来讲咁：“红嘅，白嘅，蓝嘅，绿嘅统统杀嗮。”大头民酒后发癫，大闹老板荷包蛋，闹到大汗淋漓，咬牙切齿。喺大家扶佢经过西河冲度飞拳起脚，痛哭失声：“以后都唔信荷包蛋，我要杀咗佢，佢呃我，佢呃咗我。”至于具体呃咩，佢无讲。大家只系知道朋友变成雇佣关系，友谊就唔会天长地久。正手忙脚乱折腾大头民，阿飞转过头都开始迷迷糊糊，心口作闷，干呕几啖随即失去知觉，最后两兄弟俾大家抬嗮上阿飞屋企。阿飞醒后听老窦讲大头民成晚发酒狂，搞到家嘈屋闭，老窦起身大喝几声打佢两捶先能安静入定。
之后大头民再无去荷包蛋档口。最初见佢同个好丑样嘅女人返过嚟光明路，“哒烂番瓜之貌，蠄蟝落瓣之容。”华仔向阿飞形容。最近见佢同咗个好老嘅阿姨，街里面传佢俾女人包养。再之后亦好少喺光明路见过大头民。
嗰晚连卤水蛋啲朋友共有五个人醉倒马路大街，荷包蛋个女友家欣成晚噤住佢，滴酒不沾。自此荷包蛋戒酒成功，再无饮过一滴酒。正是：无事糊涂自来忧，醉倒大街真昂鸠。
听到大头民闹自己，荷包蛋第晚上嚟搵阿飞。两人去向阳路西关食堂楼下煤店嘅路边大排档宵夜，食哩度拿手嘅啫啫黄鳝煲。哩度啫啫黄鳝，火候老到，啱啱啫到开始飘出香鲜味，干汁唔浓煲，手指公咁大碌嘅黄鳝就啱好嫩熟，野味非凡。以前之后大家都话未食过咁好食嘅啫啫黄鳝煲。哩煲嘢价格不菲成廿几文一煲，次次都系荷包蛋埋单，食得多好似成咗菠萝鸡，阿飞其实唔系好想嚟。荷包蛋今晚亦有啲心事，佢两个身世有啲似，老母都系短时间相继过世，又都系屋企只有两兄弟，最奇怪两个人瞓觉都好似张飞咁抹大双眼。佢两个系转角街口水果铺偷西瓜非常合拍，经常二个人出去，三只西瓜返嚟。但两人性情唔一样，阿飞中意张扬，荷包蛋比较踏实，阿飞无读中学却爱睇小说，荷包蛋高中毕业，却从未睇过一本课外书。
哩晚两人不自觉都倾到各自老窦可能会再娶嘅问题。交谈中荷包蛋成熟稳重，俾咗好多有益意见阿飞：“首先你两兄弟要团结，千其唔好有矛盾俾外人睇小，老窦再娶无非怕将来仔女不孝顺，听埋啲久病床前无孝子嘅影响，要多啲陪佢，同佢倾计，顺下佢意，我同老窦摊开倾好多次啦。”阿飞非常认同，发现人真唔系读书多就得，仲需要有社会阅历。都觉得第日后妈入门想氽老窦开心唯有笑脸相迎。
“我老窦宜家理都唔理屋企事。”荷包蛋讲。两人一同叹丧母之苦，相互鼓励。荷包蛋档口兴旺，两兄弟又各自有屋，佢老窦再娶欲望当然强烈，阿飞屋企水静河飞波澜不兴。宵夜不久，荷包蛋个老窦就娶咗个新老婆，仲为佢两兄弟带过嚟两姊妹。
阿飞肚疴好耐都唔好，再加上暴饮暴食唔戒口，一直都唔得彻底，只好去医院睇病。将近中午睇完出嚟，啱见到英姐个六十几岁嘅妈妈喺医院门口跌倒，连忙上去将佢扶翻起，好彩阿姨只系撞亲膝头，佢坚决唔要阿飞送佢返屋企，话阻佢上班。阿飞话今日请假睇病唔使返工，阿姨更加唔要佢陪。离开咗一阵，阿飞觉得唔安乐，喺就近药店买咗支红花油追出去搵，点知差唔多到英姐屋企附近都搵唔到。下午接到楼下玲姐电话传呼，英姐打电话嚟多谢佢，问身体点样，跟住讲：“我今晚轮到值班，有个好耐无见嘅农场农友撞返见，约咗今晚饮夜茶。你身体无咩嘢，得唔得帮我顶几个钟值班？”阿飞愿意为佢做任何事，当然无问题。
深夜英姐返嚟接手值班，唔饮酒嘅佢已经有啲醉，阿飞推单车要走嘅时候喺门口俾佢拉住：“走咁快做咩？陪我倾一阵先。”阿飞只好随佢。英姐中学毕业上山下乡到咗英德茶场做知青，高挑嘅身材婀娜多姿，年轻嘅容貌青春洋溢，性格奔放泼辣大方，好快就同一个嚟早二年嘅知青谈上恋爱。对方系高干子弟，屋企强烈反对，最后男方通过关系提早搞咗回城，两人分隔两地，音信难通。等到全国知青回城政策落实，英姐高兴万分，以为终于守得云开见月明，欢快咁打理农场欢送晚宴，早早为大家备好丰盛酒菜，几个女仔就偷饮农家自酿米酒，等大家收工嚟赴宴，开心过头嘅英姐饮大两啖就失去知觉，醒嚟嘅时候，宴席早已曲终人散，个个都赶住执行李。英姐自己都觉得好笑：“辛苦忙碌成日，整咗咁多好鎹，点知到头嚟食唔到。”
佢以为回城后就能同高干子弟重温旧梦团聚，点知对方已经结咗婚，英姐伤心欲绝。回城返嚟入咗日用商品公司，当上公司团支部书记，好快就成为风云人物，喺公司追求者甚众。但余仔同佢一间店近水楼台先得月。英姐回忆到：“吓，去到边都见到佢，我开头就觉得奇怪，你话佢系咪特噔跟踪人哋啊啦。”英姐陶醉喺以往嘅甜蜜回忆，缠绵哀怨，恰似一篇言情小说。阿飞听到怦然心动，若有所失，觉得余仔当年真系几唔要面。余仔追求成功之后对英姐好到不得了，千依百顺。英姐屋企只得三姊妹，余仔就入赘到英姐家。讲起两人一同捱过啲艰苦日子，英姐话无老公喺身边，自己都捱唔到今日，所以如果有来世，佢都仲系要嫁比佢老公咁样嘅人。英姐今晚系同农场初恋情人见面，两个各为人夫人妻，相见无限唏嘘感慨，勾起无尽回忆。
夜已深，阿飞要走。英姐讲：“只有同你先可以讲知心话，哩啲同老公讲都唔得，我唔理你愿唔愿意，我当正你系我细佬，有心事都只同你讲。”阿飞觉得咁嘅关系始终唔系几道德，虽然姐弟情同爱情有区别，但好似仲系分享咗人哋老婆同母亲嘅感情。做男人当如《水浒传》中武松斩钉切铁对潘金莲所讲：“要顶天立地，戴发噙齿。”过来人嘅情感佢唔明白，对于女人佢无惗过，无论内在外在因素，主观客观原因，宜家唔适合。
网友评论