阿飞喺度游移不定，商店陈经理嘅蛊惑却进一步升级：喺货款收入度扣起部分钱，话要作为搬运费支付，但从嚟无见过佢同搬运工有交涉；接住擅自将商品售价提高，又唔做调价表；做手脚删改商店库存表，分明想掩盖挪用咗现金，而亏空咗嘅库存数据。阿飞开始公开怠工唔做嘢，陈经理都唔得闲同佢计较，争分夺秒用佢嗰九十几样方法抓紧时间亏空间商店。
7月24号晚，荷包蛋同女友家欣，大威同女友家文，辞差，阿荣，华仔，阿飞，阿唐，阿飞细佬阿机同佢两个同学添，成支大部队到天河中心体育馆，观看香港歌星吕方为1990年北京亚运会募捐演唱会。门票虽然贵达30文一张，但大家为开眼界，为感受现场气氛在所不惜。演唱会果然热烈，全场爆满，一个半钟头里面个个不停拍掌，放尽喉咙跟住啲歌和唱。平时只能喺香港电视见到嘅歌星竟然就喺眼前，而自己就系现场观众，人人好似发梦咁。辞差同阿飞仲疯狂到两次冲到舞台边，辞差最后成功冲咗上去舞台，不过佢唔系去拥抱吕方，只系为咗抢张演唱会海报。
睇完演唱会返嚟，开心兴奋过后，工作嘅枯燥，前途嘅暗淡又摆喺面前。哩种状况嘅时候往往系阿飞出状态嘅时候：冲动鲁莽，快刀断麻。所以佢个人有好多烦恼，但成日都咁快乐——孤注一掷先把自己置于绝路吧！
演唱会第日，阿飞即时写好言辞慷慨，斗志全无嘅离职信，7月30号就直接递上分公司。 1988年，正系全民下海冲浪争当弄潮儿之时。一个礼拜之后，批准离职嘅文件就落到商店，公司开头仲想因为阿飞啱脱产受训学习过而想纠缠赔偿问题，唔知边个部门新进领导人大笔一挥：走得一个系一个，费事公司孭咁多。
广州夏季最系变幻莫测，热带气候带嚟充足嘅阳光，同豪爽清凉大雨 。 珠江水潮涨漫没河提。满城繁花似锦，绿树生机勃勃，充满住朝气。 阿飞情感上倒唔系不食人间烟火，只系无遇到令佢心郁嘅女仔。
商店附近有间糖烟酒商店。阿飞每日上落班都要经过。里面有个女仔，扁平面，普通高矮，一头掩耳短发。 女仔每日上落班都要经过 日用品商店，两人正好你迎面走来 ，我擦背而去。 女仔曾经入过嚟商店买匙羹碗筷， 大家 见过面 ，之后喺路上有时迎面碰到亦会点点头 ，两目相对总感觉对方嘅眼神有啲嘢。个女仔有一口洁白小哨牙，好似电视剧《大侠霍元甲》里面嘅香港影星米雪， 阿飞中意到不得了。啯个米雪有次经过见阿飞当班，犹豫住喺商店门口转圈，最终招手叫咗阿飞出去，一脸泛起娇羞，神态忸怩得反而系阿飞面红了，原来佢想买几口钉身上无带钱。 阿飞好想识人家 ，但 又无胆又要面，唯有将意思收实 ，每次经过都偷偷留心望下人， 继续扮快乐无忧少年。离别在即， 米雪嚟买茶叶，阿飞鼓起勇气先到商店门口等佢出嚟，对人家讲：“我要走啦，以后可以唔可以搵你倾计？”米雪一个冷不防受到惊吓：“你痴线嗝。”急急忙忙行咗去。
最后一晚正好系值班， 阿飞 一夜都唔能够入睡。 涌起好多离愁别绪， 心情久久唔能够平静， 想到听日将要面对未知嘅将来 ，离别 工作咗六年八个月嘅公司，离开相处多年嘅工 友， 离却一小段少年男女嘅朦胧情感，仲有理极都理唔清英姐嘅一番情谊。
1988年8月8日，阿飞离开工作咗六年八个月嘅日用什品公司。佢记忆中小学读咗六年，以为哩两处就系生命嘅全部：“以后唔知仲有无比哩两处仲耐嘅地方？” 阿飞决定辞去份国营工 ， 老窦当然好担心，知道个仔正一屎氹关刀，文唔得，武唔得。火麒麟周身瘾，乜都叻唔切，又乜都叻唔起，做咩都有头威无尾阵。听到佢嘅打算之后， 听到有1000文同90文嘅天壤之别，老窦问：“开车好咩？”。
阿飞好有信心：“我研究过，以后各行各业都有俾机器人代替嘅可能，唯有司机绝对唔会俾机器人代替。”
“你自己惗过，开的士好危险咖， 成日睇到新闻报道的士司机俾人打劫，听讲六甫水脚有个的士佬早几年咪喺桥中俾人捅咗十几刀捅死，宜家都未破案。” 老窦对个大仔忤逆向来无办法，话唔读书就要唔读书，情愿喺屋企睇《水浒》，动手打就离家出走，竟然试过喺海珠广场草地瞓咗个礼拜唔返屋企。老窦同样困惑当前嘅改革，同时见到对面华仔，阿庆，路口荷包蛋佢哋做个体户发家致富，都会羡慕以前同个仔一齐玩嘅都家大业大有嗮规模。广东三件宝：司机，医生，猪肉佬。个仔要做司机，起码都系第一宝，老窦只好接受哩个事实，教佢：“出嚟社会唔好学坏把口，做人低调啲。须知一山还有一山高，山高仲有树遮头。”阿飞唔耐烦，搏返老窦转头：“树上仲有雀唱歌啊嘛。”
辞工后阿飞即刻首先去办待业证。
无嘢做之后心情唔好，身体唔舒服，其实就系同一回事。先先口角生疮痛到死，跟住半夜肚疴疴到要漏夜睇急诊。朝早喺厅度大伯爷张古董茶柜大镜望下，哗，两眼通红，又惹上最得人惊，宜家周围流行嘅红眼病。正是：祸不单行路茫茫，福无双至夜漫漫。屋漏更系连夜雨，越到黎明天越黑。 奔波咗廿几日总算办到待业证，9月7日攞住同老窦借嘅2500文 ，喺大德路口“市出租汽车公司驾驶员培训中心” 报名点，交钱报名学开车。 但目前驾校好多人排队等位学车， 即使学费不断上升，估计要等三至四个月。交咗钱后阿飞又犯愁：“学车到开车远水救唔到近火，几个月时间唔通喺屋企怄臭？又回复唔读书嗰年？”阿飞过对面屋搵老道 倾计，打听佢攞车牌后最近咩环境。老道听到佢宜家咁状况就讲：“你不如去我女朋友间花园酒店洗衣房做住先，起码都有300文一个月。到时驾校通知你上车，辞工又容易。佢啯度全部合同制，酒店成日招工又辞工。 ”老道个女朋友茹女系个热心人， 喺花园酒店洗衣部做高级员工 ，阿飞马上托佢帮手递求职信决定先搵份嘢做，首先要有返收入个人先得心定。
人总系咁样，有嘢做嘅时候总觉得经常唔够瞓，失业无所事事就瞓极都瞓唔着。越到半夜越寂静，莫名其妙好端端嘅心情就忽然忧郁，彷徨，孤独，恐惧几员大将杀到集结心头，难受到你想喊出声。共事多年嘅旧工友好似亲人咁涌现，特别系英姐。明白到再唔能够同佢厮守相对，互相帮助，再唔能够听佢谆谆耳语，被佢关切凝望，佢嘅轻颦浅笑，佢嘅绰约风姿。再唔会捉自己欣赏佢嘅新衣裳，俾评语佢嘅新发型，心一阵阵拿住拿住痛。好多时正因为时乖所以运蹇，屋漏你先感觉到连夜落雨。阿飞屋企家境唔富裕，宜家失业食屋企，阿飞个细佬阿机啱哩个时候又从银行落岗，一间屋两兄弟日日面面相觑，老窦愁眉不展，苦实口面拿埋，全家毫无生气，沉重气氛压迫住每一个人，生活嘅重压透气都辛苦。
辞工过去一个月，虽然好无聊，阿飞仲系觉得辞咗哩份毫无前途嘅商店店员工作有好重大意义。以前成日觉得自己总做错，但今次一定无错，如果唔辞工做落去将来一定后悔，豪言壮语喺心里面讲咁多，都系时候走出社会见识见识实践下。
辞工后哩段时间英姐嚟过几次搵佢。因为阿飞每日走籴搞证办交费，好唔容易两人只系遇到一次。英姐先讲咗店里面阿飞走后啲乱象，话宜家都系老弱病残唔理得掂个陈经理点搞。然后责备阿飞辞工冲动，责怪阿飞走之后电话都唔打个俾佢。
“你宜家搵到嘢做未即？未搵到唔使走咁急嘛。”英姐暗沉佢。
就系因为无嘢做阿飞先觉无面，无勇气打电话俾佢。心里面发慌，面红耳热：“搵嘢做要待业证，宜家搞紧。”
“咁搞成点呢？使唔使我做家姐嗝帮你？”
阿飞面更红：“快脆啦。”
“你有咩唔掂记得嚟搵我啊，你份人唔使怕唔好意思嗝，我好想帮到下你啊。”英姐喺佢屋企摆正大家姐个款。
群群知道阿飞辞职，漏夜唔瞓又积咗一张“龙马精神”，用嘅草更幼细，积得更结实，期望能将心上人绑住，编积出嘅图案，唐三藏会意，柳下惠动心。返到商店摆喺阿飞啲物品上。阿飞知道人家心事，唔敢接受无带走到。
网友评论