今次出游阿肥负责买船票。阿肥老窦有个大佬内战时被抓壮丁去咗台湾，音讯全无。宜家改革开放两岸局势缓和，突然返嚟搵翻到佢哋一家，几十年无见全家人惊喜交集，抱头痛哭，接住走亲访友各种忙乱。所以阿肥兼顾唔到帮同学们买船票，西樵山旅游去唔成，大家都讲：“台湾返嚟一定系特务！一返嚟首先就破坏咗我哋旅游行程。”阿飞更加系深信不疑。
去唔成出外玩就只好留喺广州城聚餐食饭。同学权少屋企，政策允许之后收翻位于人民路一间被房管站经租嘅商铺，啱啱清空有地方，大家同学就你从光明路攞嚟音响，我喺六甫水脚攞嚟唱机，当晚搞咗场大食会卡拉OK。大家正喺度暗自捉对往日心仪嘅女同学合唱，突然，“哗”声响，全区停电。男同学马上分头返屋企攞嚟蜡烛，火水灯点上，同学聚会喺黑暗中继续进行。
昏暗光影里，女同学显得特别美丽娴静，个个都斯文淡定净睇男同学出洋相，此情此景渐渐有人醉了。尤榄对女班长大眼妹从细一直心存念想，要知道女班长系全班男同学嘅梦想，尤榄读书唔得，喺班度威信唔够，此刻意中人就喺眼前，要表达好无可能，触景生愁，唯有借酒意发作：“你哋细个时候都睇我唔起，啊，我系话你哋班女同学啊，无个中意我。”
大队长借机起哄讲咸湿嘢：“吁，你嗰时又未割包皮，无咩料到，又唔识得性交，边有女同学想要你。”
阿飞觉得社会改革得真系快，庸俗嘅风气都蔓延到佢哋哩代纯洁无暇，用革命思想教育武装起嚟嘅人身上。
十年真喺唔易过，十年话咁快就过，真系好怀念十年前明兴里啯啲天真岁月，同快乐时光。
啯度嘅操场留低有我哋——
无忧无虑嘅喧哗，
无拘无束嘅追逐，
无比深厚嘅友谊。
仲有好多长大以后觉得无啲建设嘅革命理想！
啯度嘅课堂亦留低有我哋——
无心嘅学习，
无理嘅取闹，
毛手毛脚嘅你我，
更有好多成家失业后发觉十分无厘头嘅年少轻狂！
啯度更留低有同桌嘅我和你——
无知嘅烂漫，
无邪嘅笑语，
无法忘怀嘅暗恋，
一定有嘅好多好多萦绕一生嘅胡思乱想！
啊，明兴里！我哋一起过嘅童年；
啊，明兴里！我哋一起过嘅友情；
啊，明兴里！我哋一起过嘅美丽女同学、、、、、、
踏入3月无几耐，当阿鸡再出现喺光明路，邀请各位同学参加佢为女朋友搞嘅生日舞会时，大家先知道阿鸡嘅频频光顾敬业，系有求民警爸爸个女同学介绍女工友俾佢。
酒店洗衣房方机组上班早，相应落班同样比较早。迎住春天暖融融夕阳，照到人软绵绵一身潮气，阿飞心情舒畅踩单车返到屋企。细佬出差，老窦仲未落班。佢即刻打开分体录音机，将音响调到大大声，挨低喺房间张沙滩椅上，将自己沉醉到谭咏麟悠扬嘅《爱念》里。窗外飘过嚟楼下，隔离各家各户嘅饭菜香，多么温馨嘅黄昏时分，赖洋洋到一啲肚饿感觉都无。哩个时候，阿肥精神疲惫闯入阿飞充满《爱念》嘅世界，一入到房间，坐喺张杠床度，就自言自语讲佢自己：最近情绪如何低落，身体如何感冒，心情坏极啦。阿肥同阿飞趣味相投，两人惺惺相惜互认为对方系知音，好多嘢都心照不宣唔使开口，其实比起佢啲结拜大佬，阿肥同阿飞更加志同道合。
阿飞讲笑问系唔系招呼台湾特务发现异常？系唔系同新认识嘅女友拍拖拍到无瘾？阿肥话都唔系嗝，总之最近感觉怪怪形容唔出。阿飞无继续揣测佢咩事，老气横秋觉得如果真心爱上一个女人就系男人烦恼嘅开始，虽然哩啲烦恼好诱惑，虽然佢未爱过人。佢宜家无条件去爱人，又无资格被人爱，“无人爱仲开心。”阿飞当时唔明白无人爱仲开心系因为仲年轻：爱念重生，尽献出真心爱一份，若是你真心，始终我会渐近、、、、、、
网友评论