干洗组组长肥佬，唔教阿飞任何技术，即使有啲一齐拍档基本简单必须要教，唔同阿飞讲嘢，即使阿飞虚心开到口询问。但任何芝麻绿豆唔对就指责阿飞，鸡毛蒜皮差错就往阿飞身上推，一日几次入玻璃屋讲阿飞是非。但新主管皮得，督导阿毛心知肚明，都清楚所谓何因，从嚟无讲过任何说话批评阿飞。阿飞却唔安乐，捱完个春交会，对干洗机操作，衣物干洗技术都上手好快，工作能力系完全无问题，但起污渍却只敢搞员工工衣。佢只读到小学毕业，未知有样神奇科学叫做“化学”，要佢面对成间诺贝尔化学实验室咁嘅起渍房，几十支全英文字进口去渍液，确实难为咗佢。阿飞决定同主管皮得要求返翻方机组，理由系精神压力太大。反正又无惗住长做，到时辞职仲翘起睇得起自己嘅皮得，害到佢措手不及。皮得安慰咗佢一番：“你坚持一段时间睇下点，应唔应付得嚟你同我讲，再考虑清楚好唔好？”同时做肥佬思想。
5月15号落班踩车经过东风路返屋企，过咗小北路就无办法继续踩，满大马路都系青年人，阿飞勉强推单车转入正南路准备走小路，迎面路中坐几个青年人，头上扎住白布，个个俾烈日嗮成朱古力，手上捧个纸箱大声用煲冬瓜哎：“请支持爱国募捐。”路边另一堆人围喺人行道数紧一地嘅收捐，路边小食店里面十几二十个青年正狼吞虎咽，脚边一地标语旗炽。阿飞好艰难挤开蜂拥嘅人流，感觉到自己唔再年青。
阿飞利用休息时间上课，攞咗考试资料就带埋返工忙里偷闲背熟，咁样嚟心中有咗寄托，返工心情就轻松，根本唔使睇其他人眼额，反而仲刺激翻高佬两兄弟转头，有时干脆当面窒过去。经过两个几礼拜汽车机械理论基础学习，驾校安排6月初测验，选取成绩头35名参加岑村考试。6月6号起床打开收音机，发现已经听唔到香港商业电台广播，去到驾校又暂停测验，等待另行通知。阿飞一下慌嗮：“死啦，二千几文可能会打水漂。咁拖落去，政策一收紧，车就学唔成。”无惗到自己嘅命运同国运捆绑埋一齐。
6月13号天气非常好，阳光明媚。阿飞接到驾校通知骑单车赶去花果山参加测验，驾校如常开考，不过就将原来分开两日考嘅教学理论同交通规则压缩埋一齐考，总共10张试卷，厚厚一大叠。阿飞毫无惧色成个杨子荣咁越有挑战越向前，今日天气晴朗，思维特别清晰，写字如水银泻地，落笔似摧枯拉陋，头未抬过一气呵成，哩啲真系佢本色发挥，检查咗一遍，第一个交卷离场。6月14号天更加蓝，风仲要爽，白云朵朵仙风阵阵。阿飞去睇测验成绩，35个入围岑村考试名额，阿飞排第3名，佢高兴到无法子形容，觉得自己个就系当今时髦人讲嘅“电脑”。
6月15号，大货车载住早晨嘅凉风向城外郊区开去。迎着金黄嘅朝阳，承载住一车青年学员嘅梦想，过沙河顶，经火葬场，向筲箕窝水库盘山公路驶去。路边山脚两旁鱼塘微波荡漾，深绿碧翠，使人极目舒心。远处田野葱葱，菜花鲜黄，有如春色未了赶衬夏日蓝天。渐渐，山路变窄，山间茂密青竹齐刷刷伸过嚟，伴随呼啸嘅山风将大货车顶打到噼噼啪啪响，此刻晨风更清爽，汽车飞得更快。阿飞噙日用脑过度，之前又担忧过度，今朝起得身早，精神不振脑袋困倦，好在近嚟小人得志，今日搏命，几大撑住。
大货车直到岑村广州车辆管理中心，大家落车先领取各种证件：学车证，学员证，准考证。再集合到一栋大楼四楼礼堂，哩度就系考场。密密麻麻坐满二百几人，部分人考摩托车驾驶证，小部分人补考。两个穿警服考官拦喺门口逐个检查清楚齐整所有证件先放人入坐，开考前嚟一段威严录音广播宣布考试规则，反复播放咗3次，然后先发试卷，个个都话未开考俾啲气氛吓到手震。阿飞一如既往发挥出色，自己估计都十拿九稳。但隔离位有个家伙拼命对佢抛媚眼，宜家在座唔系竞争对手，阿飞都礼貌咁整翻两个飞吻，佢发现现场冒险嘅大有人在。考完中午返到屋企，连续几日伤神终于有啲发烧唔舒服，原定下午想去西郊游水嗮太阳只好取消，休息瞓饱觉为上。哩关过咗，后面就仲有学驾驶同考试两关实操。
阿飞去咗干洗组已经既成事实，大多数工友渐渐对佢另眼相看，讨好卖乖。因为佢宜家系主管皮得亲信，地位不容忽视，年轻有为，将来好可能就系几年后嘅主管。仲因为佢哋平时带啲私家皮料，天鹅绒衫返嚟，偷偷搵肥佬干洗，哩啲嘢无可能瞒得过阿飞，点敢唔对佢好声好气。肥佬被识穿咗把戏，都唔再敢明帮外人公开针对阿飞，慢慢仲好声好气埋一份。当然，搞咗咁多小动作赶阿飞唔走，干洗组只得两个人，唔系你就系我，唔教阿飞咪做死肥佬？柒头磨剃刀有损无益，蚀底嘅事肥佬唔会做。即刻转变嗮口面有讲有笑，一日就教咗阿飞好多起污渍方法，用料嘅分量，咩布质咩类型污渍用边种去污渍液。对付难洗囄嘅油污，要混合边几种化学清洁剂使用，再配合高温蒸汽枪，更顽固嘅污迹都无话唔可以手到迹除。嗰晚落班仲同阿飞一齐去员工餐厅食埋晚饭，解释当初点解唔教阿飞：“因为我自己都唔系识得好多，我都系原先嗰个嘅副手，就好似你宜家咁。”阿飞个人报复心强，但唔记仇，对佢讲嘅嘢不求甚解，有佢咁说话就足够释怀，从此两个和平相处。
阿飞之后起污渍技术达到咗出神入化嘅境界。花园酒店员工每人每月领一个硬纸皮饭卡，每次去员工餐厅食一餐就用圆珠笔剔一次，每日有早，午，晚，夜四餐供应，每人每日只允许食两餐。阿飞单身寡仔，最在意有地方解决佢每日三餐，而且又中意食酒店员工餐，菜色丰富多样，一日两餐唔够喉。懂得起污渍之后，每次去餐厅食完返嚟，就将圆珠笔剔痕清去，丝毫痕迹不留，又无损张纸皮饭卡，咁每日就任佢食足三餐。酒店个个人都有屋企，唔一定需要喺酒店食三餐，但都会有时某人需要到搵阿飞。帮下哩个帮下嗰个，风声传咗入员工餐厅厨房。以后凡洗衣房嚟食饭就如临大敌，将个饭卡验尸咁验过。却怎敌得过阿飞宜家技术登峰造极无与伦比，竟然一直无俾人睇出破绽。
6月中旬酒店分花红，财务部电脑出错，计多咗大半个月200文花红阿飞。听茹女讲哩啲事时有发生，主要系记录工龄方面出错。阿飞感觉花园酒店真系自己嘅福地，觉得宜家咁嘅地位离职真系好可惜。但佢又始终清醒知道留喺外资酒店自己有个致命死穴：唔识英文！做几耐都唔会入到玻璃屋。阿飞惗人生一世几辛苦都要出去社会广阔天地走一走，临老对自己有个交代。
23号去花果山驾校睇车管所嘅考试成绩：合格！被安排喺今年10月份正式上车学驾驶术科，虽然又要等耐差唔多四个月，但今次总算有个确凿日期。反正宜家喺花园酒店做得得心应手，正好搵多几个月钱嚟学车使用。阿飞惗到以后学车手臂上有纹身，可能俾个师傅当烂仔整蛊。哩个纹身系当年大头民偷渡喺监仓俾个监友纹咗把十厘米大刀喺手臂上学返嚟，出监之后逐个纹咗阿庆，荷包蛋，阿飞一个梅花。阿飞觉得纹身象征义气，口齿，带俾自己胆量同勇气，摆明爱憎分明嘅原则立场，仲觉得纹身又辟邪又挡煞。不过宜家社会咁顾忌，尤其啲女仔，大头民纹得又唔靓，想搵个地方清除咗去算啦。趁休息去医院问过，无此立项。算！
网友评论