第十二章
9月开工，阿飞明白到返工意味住辞工。按合同规定辞工要提前一个月申请，10月份上车学驾驶，即上班第一日就要递辞职信。心情多少有啲紧张，感情多少有啲难舍，更加怕面对皮得可能嘅极力挽留。大休返嚟，大家啲面口都好睇咗，可能因为分开咗一段时间，可能因为少咗一半人，一切好似转咗新环境咁，大象，雄仔同阿飞都有讲有笑。由于少咗一半人上班，偌大洗衣房显得空旷，大家玩用脚将拖鞋飞得斗远，唱歌斗大声，扮女人叫斗相似，好似恢复翻初嚟洗衣房时嘅开心。高佬健都经常从布草喉过嚟一齐玩，督导阿毛无大家符，因为无咩嘢做。
纠结拖延咗一个礼拜，9号嗰日阿飞终于鼓起勇气入玻璃屋办公室，向皮得递上牵肠挂肚嘅辞职信，将即将要学车而不得不离开嘅缘由如实相告。皮得听到，显得十分理解，可能酒店员工人各有志，人员流动频繁，佢都见怪不怪。皮得非常有风度讲：“我代表酒店多谢你喺度嘅努力工作，希望你继续认真工作好剩低落嚟嘅哩个月。”
阿飞入玻璃屋，眼利嘅都见到，毕竟办公室全透明无可遁形。第日过干衣组，咕咕就知道佢要去学开车即将离开花园酒店，同阿飞倾计流露出依依不舍之情：“真喺唔舍得你走啊！我曾经发梦见过你啫，不如我送幅画俾你，你留低个屋企地址俾我，大家互相联系下吧。” 又话俾阿飞知，佢已经同男朋友分开咗。阿飞就唔明自己发梦总系无见到靓女，即使梦遗都系电影里面啲地主婆，女特务。唔明咁靓嘅女仔唔嚟同自己梦中相会，喺度讲哩啲嚟咩意思？佢宜家成付身心忧虑紧到底能唔能够舞得掂部解放牌大货车。佢费事令人误会又虚荣作怪，有意无意暗示自己已经有女朋友，当然咕咕好快就从茹女度将佢嘅大话拆穿。
大象，雄仔同宜家主管皮得都系酒店开张时同期入职，唔多服气被佢领导，成日暗中搞小动作对抗，出工唔出力故意拖慢工作进度磨洋工，皮得同佢哋关系好紧张。雄仔最近玩得过分疯癫，一日经过水洗机旁边，有台用嚟称布草重量嘅地秤称。佢唱住Beyond：“没有泪光，风里劲闯，怀着心中新希望，冲一冲，多一次，不息自强。、、、、、、天可变，风可变，不息自强这方向、、、”手舞足蹈挥拳一击，无情力唔觉意将地秤称块显示屏大玻璃打裂成几块，当场都吓到佢自己面青，好彩在场只有高佬健，肥佬两个，都系成日玩埋一堆嘅，无其他人睇到。雄仔好有当时啱毕业后生嘅不知天高地厚，同佢两个讲：“你哋只要话乜都唔知道，就当咩事都无发生，宜家嗱嗱声返埋自己位做嘢。点柒知块镜自己会裂开啫。”讲完三个扮做若无其事散去。此时正当中午，阿飞同大象去咗食饭。皮得饭后返嚟就听到阿毛汇报：“洗衣房部地秤称显示屏玻璃被人打烂咗。无人认，无人见，但明显系人为损毁。”因为个地秤称系外国进口，块玻璃好厚，无咩可能自爆，皮得心中愤怒，认定系班旧人故意玩佢。哩个秤喺酒店开业前，大老板去庙宇开过光，开张就作为神物摆喺地库起风水作用，宜家烂咗班半岛香港佬认为系噩兆嚟临，加上生意萧条更加有籍口可赖。鬼佬总经理同各高层络绎不绝亲临现场察看，都认为要大力追查，仲限时即刻破案。排查无声无色进行，主管，督导逐个搵人入办公室问话。咁细范围，员工少咗一半，破案一啲唔难，方机组就更加知道系边个所为，关键系无人出嚟指证。阿飞唔关自己事，雄仔从无当面同佢冲突过，都系随大流起哄笑埋一份，宜家日日一齐玩咁开心都唔想雄仔被人炒，就鼓励大家死口咬实，使得无法指证最后不了了之。
第日，雄仔被叫咗入玻璃屋，从外面睇得一清二楚，皮得同佢激烈争咬，一阵间，雄仔推门出嚟，面色发青发白，个样好似就嚟要死要死咁。大家即刻追问佢：“点样啦？”
雄仔话：“皮得讲有人睇到我打烂块镜，要我主动承认，听候处理，否则强硬到底就搵人当面指证，嗰时就唔止开除咁简单，仲要追究责任赔偿酒店损失。”
阿飞份人唔到黄河心唔死：“佢抛你啫。”
高佬健突然醒悟惊叫：“嗰个镜进口好贵咖。”
雄仔恶死能登恨恨讲：“就系唔知佢搵边个指证我，知道边个阖家铲我衰咗唔会放过佢。”
阿飞讲：“又系食饭时间，照计当时无嗮人喺度啦。”
大家都话：“会系边个呢？”
“肯定唔系我。”高佬健都惊雄仔啲蛮横。
哩个时候，一个人悄无声色起身离去。
“就系佢！”个个都恍然大悟肥佬系鬼头仔。
“你老母。”雄仔双眼露出凶光。
阿飞激动到以为自己置身松本清张《点与线》推理破案现场。
大象话：“既然咁样被人断正，雄仔实俾人炒。大家听我讲，今次雄仔炒咗，第日迟早唔知会轮到边个，反正皮得唔妥我哋，喺度做落去都无咩运行，我哋不如干脆一齐辞职走人。”即刻群情汹涌，一呼几应，马上就搵笔搵纸起草辞职信，几个有学历无学问嘅中学生搜肠刮肚，扰攘好耐先写得完。大象执笔第一个签咗名，雄仔系当事人，当然义无反顾，有个叫阿泉同雄仔喺风干组拍档，拍档走，佢亦只好签埋一份。宜家搞到阿超着裤焗住，现场人人都走，唔到高佬健唔舍得走，焗住签埋名。四个人雄赳赳气昂昂闯入玻璃办公室庄严递上集体辞职信，皮得大惊失色，皆因目前只有一半员工上班，本来男工喺洗衣房就奇缺。水洗机一次出入200斤布草，女工好难胜任到。宜家连阿飞在内都系要离职嘅，咁即系无嗮男仔做嘢，洗衣房马上就要停工。事件即刻惊动酒店高层，派咗皮得顶头上司房口部管家吴生落洗衣房坐镇，当即向全体员工宣布：停止继续追查地秤称事件。然后逐个搵佢哋四个人谈话，要佢哋收返集体辞职信。雄仔哋商量过后怕被皮得秋后算账，坚决要求辞职。吴生要大家等待酒店研究决定，拖住佢哋。啱好哩几日洗衣部趁酒店客人少，布草少，员工大部分休假，准备翻洗全酒店布草工衣，堆咗三十几车布草入嚟，成间洗衣房塞实嗮无得郁，方机组男仔个个都唔肯加班，成间酒店眼睇要暂停运作。吴生，皮得愁眉不展，大象，雄仔，高佬健佢哋觉得今次翘起咗酒店，日日开心狂欢，做嘢放咁慢得咁慢，唱歌得咁嘹亮有咁嘹亮：“留，住，我，吧，留，住我好吗？”一味唱太极乐队哩首歌，四个人仲同自己起个名叫：“LaundryBand”。狂欢咗几日，酒店出手采取行动，首先即刻招入咗一批新人，同时将正在放休嘅茹女，高佬辉，阿清哋通知返酒店上班。跟手以怠工不服从管理为由将雄仔，大象，高佬健三个为首人员开除即炒，安抚咗阿泉继续安心喺酒店做，打烂地秤称件事总算得到平息。
日子一眨眼就过去，真系到咗要离开，心里面又有满腹愁怀。阿飞踏入酒店第一日就惗住离开哩一日，却惗唔到一年之中大批老员工先佢离去，可见社会发展人事变动之剧烈。一年嘅时光真系快，恍如流星飞逝，有人留意到，有人疏忽咗，但哩一年里面真有讲唔完，写唔完嘅故事，竟比6年8个月嘅商店生涯有更多离愁别绪。10月10号，阿飞返酒店正式办埋离职手续，经过员工餐厅见到一大批人等紧见工：“如果学完车，搵唔到嘢做就去学英文，再返嚟酒店发展。”
当晚，茹女，咕咕，阿泉约佢去沙面溜冰场踩屐。咕咕原来好饮得啤酒，买嚟请大家饮，阿飞一樽落肚，酒入愁肠，感触莫名一手将个酒樽喺地上掟得四分五裂。
网友评论