高佬健每日推布草过水洗机组，乘机就坐低透下，偷鸡一阵同组员玩。阿飞感觉上同佢一齐喺大烫组做过，大家算系老友，所以对佢特别亲热熟络，说话随便，高佬健对佢点阿飞从来无在意。
洗衣部员工过百，男工只有十几个。洗衣房占地面积好大，组与组之间相隔好远，两个督导管理严格，行差踏错啲都警告开黄单。女督导冬妹一日都黑口黑面，女工都怕佢。阿毛就更黑，真正非洲黑，当你啱坐低想饮啖水，黑擝擝角落头就有对眼监视住你。高佬健都经常啱推布草过嚟，就俾佢叫走赶返过布草房，好难囄身去搵人倾计。工友之间只有食饭，或者喺更衣室匆匆见过下，方机组更加因为人少，食饭轮住去，交流机会都无埋。大家最有机会就系过布草喉间房匿埋捉象棋，哩度布草堆积如山唔易发现。人与人新交往之间，双方对彼此间任何输赢十分在意，都想有啲杀食嘢露俾人睇。阿飞个老窦捉象棋就好叻，除咗见佢输过比逃犯范子强，但范子强却输过俾阿飞。阿飞无受过正规教育，知识文化唔见得叻过人，动脑筋仲系可以。阿飞未嚟洗衣房之前高佬辉棋艺最高，阿飞嚟到无人能赢到佢。
赢棋会令人欣喜若狂，赢者嘅得意忘形更容易刺激失败者。仲要哩个赢者乳臭未干就沾沾自喜，把口又跳，讲嘢唔识分深浅。阿飞24岁，喺街度都系从细就识嘅同学朋友，系商店都系疼锡佢嘅年长阿姨，但哩度系花园酒店洗衣房，社会改革嘅前沿阵地。
有日，大家都喺水洗台。茹女将一桶新领嚟嘅草酸要阿飞开盖，佢仲有嘢做就行开去。哩种桶好难开，要用手慢慢揭，如果唔系只手会好痛。旁边高佬辉睇到机会就讲：“阿飞，俾一分半钟你揭开，输两个游戏机银俾你，揭唔开你输俾我。”
“分半钟？好啊，细细哋赌下。”阿飞惗咗一惗，佢当人同佢增进友谊。结果过咗时间揭唔开，阿飞输咗。
“我有两个机银啦。”高佬辉振臂欢呼，输棋啲怨气终于可以宣泄。
“屎都閪咁，分半钟咁耐都开唔到。”高佬健突然喺旁边冷嘲热讽。
“咁有咩出奇啧，你咁叻你嚟试下啊。”阿飞唔容易认错更加唔容易忿输。高佬健好有把握扐块酒店毛巾垫住手，用力一揭即刻就开，半分钟都唔使。
高佬健得意咁讲：“我又有两个机银啦。”
“有同你赌咩？”阿飞嬲啦，正唔知点出气。
点知高佬健即刻声大夹恶：“你够胆唔俾？”
阿飞一肚唔忿：“唔俾又点啊？有话同你赌咩，用布垫，我都得啦。”讲完把盖吸返实，用布垫住用力揭两揭，即刻又开咗。
“我啱揭过梗容易啦，你只烂春袋洒矛赖，信唔信我打你阖家铲。”高佬健讲完跟手就打嚟，阿飞一句：“我打你老母。”举手格住，另一拳就踵埋高半个头嘅高佬健，少林，武当马上拉开架势上演洗衣房论剑。
督导阿毛一抱揽住少林高手阿飞：“你哋打咩交？系咪想博炒？即刻返开去做嘢。”随即驱喝众人离去。武当唔愿胜负未分，威胁：“你够胆唔俾！”一边撤往布草喉，少林亦想见个高低，冷笑：“俾你嗰个系傻嗝。”随即被阿毛押住离开。
过后无人再提两个机银，少林，武当相安无事，依然屹立武林称霸洗衣房，不过就暗流汹涌。表面阿飞着咗数，所以遭到原来老臣旧人，自然积聚起嚟内功外力围攻，讲亲咩都有人反驳，讲错嘢更加被人耻笑讥讽，仲俾大家起埋啲“姑爷仔，小白脸，小丝丝”嘅花名，当然背后一切都系武当落力所为。有日同高佬辉捉棋，就讲：“你讲句公道，嗰次我有话过同佢赌咩？佢、、、、、、”仲未讲完，高佬辉一句窒过嚟：“小鸠气啦，输咗买两个机银俾人啦。”阿飞好似抱错佛脚咁面都懵嗮。不过把口仲好硬：“佢有无本事先？”
阿飞越强硬，佢哋越搞鬼佢，专搵佢鸡脚，一班旧人将新嚟嘅佢死死挡喺外面，将佢无形咁孤立。高佬辉，高佬健当正佢仇人咁完全反嗮面，其他人对佢避之则吉。阿飞此刻真正体会到社会嘅现实，人与人之间嘅冷酷，私企同国营商店嘅唔同。外资酒店制度等级分明，有阶级就会有斗争！为咗升职，为咗利益工友之间明争暗斗相互倾轧，关系冷漠。酒店里面啲人都唔会同你交心，好怕俾你知道佢啲咩嘢，唔想同你深交，出咗酒店都唔想识你。唔似国营商店有种大家庭嘅温暖感觉，有做错都互相体谅。你话同陈经理不和，双方仲顾忌阿飞老窦面子，始终发展唔到你死我活地步，好似英姐咁仲可以赖以寄生。喺大烫组仲唔多感觉，方机组哩度系完全生存与灭亡嘅斗争，你嘅出错都系个个迫不及待同万分期待。
阿飞被众人孤立每日闷到发癫，无嗮人理睬佢，日日好似行尸走肉咁返工。嬲到想搵班人嚟同佢哋打场大交，惗下又未至于要咁，而且解决唔到问题。茹女每日要照顾十几台变形金刚，安排出入布草顺序，唔得闲知手下几丁人搞咩东东。阿飞点闷都唔会搵女人倾诉，拿手好戏就系装若无其事。
俾人孤立，同茹女嘅接触就多咗，开头都系围绕老道同学时啲臭事讲下笑，慢慢话题转入生活，社会，新闻事件嘅睇法。渐渐茹女瘦小嘅个子喺阿飞眼中高大起嚟，发现佢有着同外表唔相称嘅美好品德，随遇而安嘅乐观心境，豪爽嘅男仔性格，虽然平时见佢一副好多嘢惗嘅样。宜家先知道老道点解中意身材样貌平平嘅茹女，连阿飞都觉得人真不可以貌相。同茹女讲开酒店哩度上班时间，薪水待遇都唔错，顺便多谢声佢帮忙介绍入嚟酒店。茹女劝阿飞不如放弃学车，安定落嚟哩度。其实阿飞都成日困扰哩个问题，要放弃呢，就始终觉得自己欠缺一样生存嘅本事，留低哩度好似苟且偷安，迟早有日会遭到被社会发展抛弃嘅苦头。加上目前人际关系恶劣，佢早立定离去决心。
倾谈中茹女讲高佬辉同高佬健系同母异父嘅兄弟。阿飞先明白自己初涉足社会行事鲁莽，无带眼识人，一味自己古道热肠，就随便交浅言深，得失人咩嘢唔知。知道继续对抗落去对自己不利，好汉不应吃眼前亏。同时发现自己个人气量窄，报复心强嘅缺点，就开始主动搵机会同其他人讲话缓和紧张，尽管佢觉得咁系妥协，同现实低头，但亦明白到做人系无可能一直强硬嘅。
高佬辉，高佬健，雄仔，大象最近喺水洗台度玩拗手瓜，较量手力。阿飞虽然玩健身，啱嚟水洗组，大家都话佢人仔矮细，身材唔简单。但比起佢哋个个都高近米八，牛高马大，之间实力仲系非常悬殊。阿飞主动埋去睇大家玩，讲嘢就小心好多。有时佢四个玩得耐都掺埋阿飞入嚟，阿飞就逢拗必输，仲被佢哋取笑，阿飞惗佢哋可能想玩自己先专门布哩个佢特别弱嘅游戏，等佢嚟出丑。为咗避免被孤立，佢逢叫必到，必到实输。阿飞握住酸软但越嚟越有力嘅拳头：我唔信日日裤穿窿，终须有日会龙穿凤。
网友评论