第十章
明兴里小学男女同学玩翻埋频繁有活动。当然里面嘅源动力来自两方热衷于此嘅人，女同学方面情况不明，男同学哩边最积极热心就数阿鸡。
阿鸡住喺带河路，离光明路好远，去大庙返学就近。佢系留级生，逢二进一，留咗两次，啱好落到阿飞佢哋班，智力先同大家啱啱睇齐。阿鸡书读得一塌糊涂，做坏事都无啲醒目，同大家去小食店偷早餐，都喺个书包面留低好大一个咸煎饼油印，成咗此地无银嘅确凿证据，青年路一带商店见此记印就知小偷光临。打交又唔得，佢个人瘦到一条藤咁面无三两肉，一交起手就鸡咁脚落荒走到无雷公咁远。净系把口得，佢个人唔讲大话，但成日将说话作大，将一面之缘讲成世交故旧，将街头斗殴描述到淮海战役咁。你话佢一事无成咁又真唔系，起码成功影响咗几个同学嘅命运。读完小学升初中无耐，阿鸡就适应社会变革退咗学无读书，到老窦单位广州打火机厂做“八路军”搵钱，阿飞又跟佢退学唔读书，点知就白等咗2年先参到军，而此其时全国刚刚恢复高考几年。
80年代初广州城南风窗敞开，香港客回乡。时尚流行嘅奇装异服，新潮高档嘅家用电器，朗朗上口嘅时代曲一下子将贫穷落后与先进发达鲜明咁对比凸显出嚟，激发咗大家对美好生活嘅向往和追求并付诸行动：集体偷渡香港。
同阿鸡住埋一条巷嘅街坊倒屎强大阿鸡几年，大半年前佢表哥扒火车偷渡落咗香港，留低一条成功路俾佢——原来湖南衡阳铁路货运站，每星期会有火车运货到香港。倒屎强一个人偷渡无胆，又想搵人分摊水脚，佢搵埋人越大越有惗头嘅阿鸡。两个从广州坐火车到咗衡阳，送咗部时尚高档嘅三洋录音机俾佢表哥介绍嘅熟人，一个火车站工人。工人一路叮嘱佢两个青年：“到了香港，将来发了大财，可别给把我忘了。”一路将佢哋偷偷藏在货运火车厢啲物资货箱中间。车厢里面又焗又闷，不见天日，好在倒屎强都做足功夫，备咗面包同水。经过不知几耐嘅颠簸，火车终于停咗落嚟，喺夜晚到咗一个货运站，等听日卸货。两个按前人教落方法撬开火车门，趁天黑跳出车厢。举目四望，野外茫茫：哩个就系东方之珠，自由之都嘅香港？阿鸡心情激动啱想振臂，倒屎强黑嘛嘛之中终于睇清站台上“黄埔站”三只大字。
同倒屎强夹份部三洋录音机洗嗮阿鸡做八路军啲积蓄。虽然第一次偷渡唔成功，但阿鸡都了解到衡阳确实有货运火车到香港，而且仲有另一种方法可以去，好似铁道游击队咁飞身扒车。阿鸡决定唔同倒屎强一齐，自己组织自己啲同学去。哩个时候正系偷渡潮风起云涌之际，阿鸡无咩威信，阿飞信佢唔过，佢要偷渡都跟啲结拜大佬游水去。阿鸡将佢第一次经历讲得眉飞色舞，精彩过敌后武工队，惊险过渡江侦察记，最终鼓动到阿肥，傻星两个。喺阿鸡指导下佢哋做咗好仔细嘅准备，包括喺漆黑嘅雨夜去五眼桥附近观察火车运行状况。然后两个15岁嘅学生，逃学旷课跟阿鸡去到衡阳，落火车后连夜赶去铁路边一处扒车热点埋伏。哩度系货运火车啱啱从站台始发，即将加速之前嘅弯位，车速较慢，最容易扒上去。不过自从扒火车偷渡热之后，车站为加强防范，喺不长嘅弯处尽头加装咗刚够一个火车厢卡过嘅铁框，使外面人不能够攀附车身外，以阻碍闲人靠近。所以，要扒火车去香港，你要睇准无盖顶嘅货运火车，比如运煤之类，仲要喺入弯前短短时间内扒上去并藏身入车厢，身手真系要敏捷过成龙。哩晚正系夏末秋初月黑风高，一列疑似发往香港嘅货运列车徐徐开出，到站外弯处一声长叫，车速随即慢咗落嚟。漆黑中，都唔知从边度突然涌出好多人影，冲向行驶中嘅火车。阿肥，傻星跟住人潮扑埋去，点知三两下就俾人用力推开嗮。阿鸡年长老成仲算摸到火车厢旁，但无处落手攀扒。身后一个人闪电咁快伸出一把小铁梯勾住车厢顶，两下动作就消失车里。阿鸡大喜过望，出手就拉住小铁梯，纵身就要上。点知眼高手低，无抓稳，前面拦人铁门框又到，佢急忙跳车，落喺铁路石上，感一阵钻心裂痛，痛到佢想死。前面四周响起呐喊声，几十道强烈嘅手电筒光划破黑暗，严阵以待打击偷渡嘅铁路公安干警四面八方赶嚟将阿鸡，阿肥，傻星所有人等一网打尽。阿肥，傻星两个学生受到学校记大过处理，阿鸡跌碎咗左脚后踭骨，医翻后有啲高低脚不平。
唔知系年纪大二年，各部位成熟早，抑或唔读书无知，阿鸡唔多识得羞耻。同亲女同学一齐就动手动脚拉拉扯扯，可能佢自己唔觉，但大家睇到都面红耳赤。阿鸡留级到哩个班对佢一生意义重大，命运嘅嘢真系唔到你拗颈，当然命你改变唔到，运仲系要自己争取，阿鸡明白自己年纪最大，又有轻度跛跛哋，你睇佢几咁积极争取自己嘅桃花运，又远赴光明路嚟搵同学们组织男女同学聚会。
阿鸡哩晚约埋光明路班男同学去隔离青年路嘅女同学屋企坐。哩个女同学个爸爸系旁边荔湾公安分局民警，小学嘅时候喺男同学中好有威望，大家经常见到佢爸爸一身布制服，腰间孭支手枪喺哩一带巡逻，咁到底系支枪有威望定人哋爸爸有威望就好难讲清。阿飞坏事做尽，又第一次去女同学屋企，内心真个七上八落忐忑，坐落先打听清楚，好彩，世伯已经退休。阿鸡商量搞男女同学聚会，提议今次由男同学负责请，显显男士风度，因为上次女同学请咗大家去生日舞会。阿飞成日聚集同学们打交有凝聚力，由佢负责召集男同学。阿飞槽钱计划紧张过政府招商引资，口头就应承出面召集，却唔定确切日期，拖下一日，拖下一日，赖赖闲眨眼就要到过年。老道，阿肥都不时追住问，阿鸡等下等下唔系路，亲自上到阿飞屋企捉人，拉住佢将女人头，尤榄，老懵，大队长逐个联络好，扑到阿鸡身水身汗使人一望而知何为敬业。阿飞无办法，醒起同学区鼻佬宜家喺河南同福路卖毛鸡，提出过年前男女同学结伴到已经结婚嘅钩鼻佬屋企食饭聚餐，咁大家男同学就完全唔使破费。
网友评论