初三早上阿飞一觉醒嚟：9点正。洗完面行出街口去青年路坚记面店食早餐，返嚟着定衫执好行李坐到10点半都无见到一个人嚟。阿飞就思疑，惗可能班人其实系买唔到车票，想玩下佢，等佢傻傻咁盛装出门，笑餐饱。啱想过阿唐，华仔两个度问问，辞差嚟到。佢证实车票已经买咗。但睇下个钟两个都急起嚟，匆忙先过对面揾华仔，再去六甫水脚搵被老窦摇极都摇唔醒嘅阿唐，佢仲懵醒醒唔知咩一回事：“你哋点解唔去荷包蛋档口嗝？”辞差话就系荷包蛋唔喺档口，佢先过嚟阿飞度。联想到噙晚荷包蛋同大威都有啲紧张嘅神态，讲嘢又支支吾吾，大家觉得有跷蹊。阿唐屋企个钟已经指向11点正，四个人冲出马路，10分钟过去都拦唔到的士，好难咁截住一部，平时去火车站3文车费，司机要5文先肯去，无奈只好暗哑底被人劏。直接坐到广州火车站，果然揾到荷包蛋，大威两个，却唔见阿荣。哩个时候阿唐又走失散，辞差嬲到爆，叼佢两个：“叼，你两个喺车站都唔系等我哋嘅，而系等你哋两人条女。”
大家一肚气，阿飞大闹佢哋：“重色轻友。”
华仔加多句：“卖友求荣。”
辞差话：“你两个一心想卖甩我哋，我对天发誓以后唔再同你哋去旅行。”成班人喺度集体声讨。阿飞，华仔，辞差三个企喺售票大厅门口，迎住寒冷嘅气温，远远见到阿唐返紧过嚟，听住大威催促叫唤上车，几个都赌气，阿飞话：“唔鸠去啦。”啱啱先急急匆匆跑去接到两个女仔嘅荷包蛋嚟到唔出得声，佢哋两对情侣放低五张车票默默咁入咗闸门，急忙上车而去。望住佢哋嘅背影，四个人议论住，商量今日计划啲咩有趣节目，过得比去中山温泉旅游更开心。
四人重新打过的士去到阿唐屋企，食佢妈妈煲嘅生菜粥同煎萝卜糕，然后各自返屋企先瞓饱觉。傍晚，阿飞同细佬去阿嫲度拜年，返嚟喺前屋大伯爷伯娘度同三个堂大佬食晚饭，系好丰盛嘅八菜一汤九大簋过年饭。8点钟，阿唐，华仔，辞差按约定准时嚟到，大家都好高兴，觉得成班“寡佬”自由自在，唔似荷包蛋两个俾女朋友约束死。屋外面刮起大风，落起磅礴大雨，夜晚强冷空气杀到。阿飞细佬以为大佬去咗旅游，都约咗朋友上嚟打麻将，两台人玩得好开心，细佬有个四眼仔朋友讲嘢好鬼幽默，大家搞笑咗一晚。
天光，四个去广州宾馆饮茶。返到屋企，阿飞又一觉瞓到唔知几时，只觉得一身困倦，头痛欲裂。突然心底有种万念俱灰嘅忧郁：过年真系无咩意思，赌完钱就瞓，瞓醒就食，节日咩味度都唔知。仲有今次同荷包蛋，大威搞到咁僵，佢哋返嚟都唔知点面对。其实，佢哋当时扫兴唔去，唔系人哋有女朋友，主要系带照相机嘅阿荣无嚟。个个都想过年影啲靓仔相，尤其阿唐过年买咗咁多靓衫。
阿飞惗：“哩个年好卵冻啊，宜家过年都无咩好玩，我哋哩班人几时会解体呢！”
初五晚轮到阿飞留店值班。未到6点佢就返到商店接大家落班返屋企过年，英姐封咗两封利是，每封10文，系哩一年收到最大两封利是。阿飞扫干净商店地面，半个钟后就锁门偷返屋企同老窦细佬过年，老窦今日休息喺屋企劏鸡。屎忽都未落凳，荷包蛋就冲上楼叼人：“你班柒头去到车站都唔去，系咪玩认真先？搞到我哋两个喺条女面前无嗮菲士，好彩佢两个系同学啫。”阿飞笑嘻嘻，反觉自己几个无道理。哦，原来佢哋两个女友系同学，咁就无咁容易散。
听荷包蛋讲同大威去完中山温泉返嚟，二世祖同佢大佬卤水蛋，工仔伟明五人玩showhand，广州话叫“暗底”，一种全世界都好通行嘅赌博游戏。大威眨眼就输咗300文，后尾死博烂博最后追翻唔使输离场，大威大叫大步揽过。二世祖输咗500文，俾卤水蛋，荷包蛋赢嗮。阿飞听完眼都凸嗮，惗大威当时肯定惊到屎忽毛都囄齐，宜家越玩越大，锄大弟都赌5毫一只，纪录不断刷新，咁落去朋友之间迟早出事，趁赌到宜家钱财无损，元气无伤，真系要收手戒赌先得。
两日后轮到阿飞休息，二世祖唔忿气又嚟，阿飞出粮先得啯40文个月唔敢玩，伟明输到已经问卤水蛋两兄弟借粮使亦唔敢落场，只得荷包蛋，大威，辞差三人应战。阿飞无得赌，趁休息返屋企玩健身。傍晚阿荣落班嚟叫去青年电影院旁边食奇实洪寿白切鸡。过到荷包蛋档口等埋华仔期间，荷包蛋，大威，辞差，阿荣几个人锄大弟，阿飞一下输咗40文成个月工资，食饭时就借酒买醉大发牢骚。“只柒头成日赢，输少少就嘈喧巴闭。埋单！返去再打过，俾机会你翻身。”大威老大唔高兴。返去档口，阿飞同阿荣孖份，仲输得厉害，输咗成百文，咩龙年好运，咩元气未伤，美好嘅愿景一下子摧毁嗮，发现自己并不如想象中健身后手瓜起蹍，跟住有钱。极度悲观借住酒劲迅速蔓延上脑占据身心：你话宜家喺度为乜？做人有咩意思？无女朋友无钱，无路数无机会年纪唔细。成日觉得有啲文化，开声能惊天地泣鬼神，但宜家无人要你有文化，要睇你有无摩托车有无BB机。有中意人或者有人中意，又自卑又自欺，又无钱又要面。随住年纪明显感觉心理生理日渐整装待发，身心有啲微妙嘅变化，有种讲唔出嘅渴求。而且更害怕咁发现，渐渐不知不觉中爱上咗人哋个老婆。喺最落魄，最孤独嘅时候，内心嘅一点点安慰只有来自英姐嘅情谊。每日会不自觉留意佢嘅身影，喜欢上佢散发出成熟女性风韵嘅样貌，盼望佢对自己关怀体贴嘅说话，或者轻柔嘅责骂，甚至开始幻想。英姐休息嗰日，阿飞竟然感觉非常难受。
第日返工落中午，英姐接佢班，知道阿飞返到屋企无饭食，早煮埋佢份带返嚟俾佢，返到冷清嘅屋企食住热烫嘅饭餸，阿飞个心为英姐完全融化嗮。
人喺乜都唔顺嘅时候最容易想随便拿条救命稻草。对于男人嚟讲女人哩条最救命：“人哋个老婆都好啊，话唔埋第日自己个老婆都会同人勾勾搭搭，不如趁现在先勾搭咗人哋个先。”思想激烈啊，斗争啊，混乱啊。胡乱思想一阵，理清咗下思绪，阿飞发现其实唔系哩个问题困扰自己，而系春天嘅缘故，哩个霉雨季节使人容易愁困，可能过一阵就咩事都无嗮。佢转头又发觉自己嘅真正愁困系忧心跟唔上社会改革嘅变化，担心时代进步超越自己对命运嘅把控。以前一直认为做人愚蠢比聪明快乐，因为蠢所以只有近忧而唔识远虑，人最头痕就系要远虑。宜家发现近忧就系因为无远虑而积累喺面前嘅，自己一直回避，日积月累嘅近忧令自己身陷绝境而觉生而无趣想死想死。但远虑虑啲咩？点虑？阿飞唔识！
网友评论