9月中，夏季奥运会喺南朝鲜汉城开幕。当晚一向斯文讲理嘅老道突然满面怒容杀气腾腾喺街上逐个叫齐老懵，尤榄，阿飞，阿肥，女人头班同学，话女友茹女喺酒店被一个男仔追逐，要拉人去酒店帮女友出气。第二日傍晚，喺建设六马路嘅酒店员工出入通道口，成班人等咗二个钟头，都唔知咩状况，老道急到围住花园酒店转圈，酒店员工门禁森严，佢几次想混入去都无功而返。最后茹女出嚟话大家知个工友从酒店侧门逃脱咗喇，无事就算啦。可能实际系唔想个男朋友打人，叫大家走。交无打成，但喺茹女工作嘅洗衣房传开嗮，影响极坏，俾部门上一级高管叫咗去问话。阿飞听到担心介绍工作嘅事有变，心头蒙上咗一层阴影：“求职信递交咗已经过去两个礼拜，唔能够干等，睇嚟要惗多条路数先稳阵。”
中秋节前一日，英姐带咗水果月饼嚟睇阿飞，关心佢近况。要个家姐上门探望，阿飞羞愧到无地自容，感谢嘅说话都唔会讲。同英姐汇报咗最近诸如交钱学开车，另外打算先到酒店做工嘅计划。英姐问佢需唔需要钱周转？要钱开声。阿飞连忙话唔需要，佢唔想受咁多恩惠。英姐要咗阿飞附近公用电话号码方便搵佢，问埋屋企地址，以便有时寄信联络，约定一有时间就搵佢饮茶食饭。
中秋节一大早，阿飞落楼去日杂店买蜡烛，晚上点灯笼用，一眼见到楼梯地下有封信，系寄俾自己嘅，里面系9月28号花园酒店面试嘅通知书。刹那间，辞工以嚟种种嘅提心吊胆，集结郁闷心头嘅烦扰顷刻之间无影无踪，烟消云散。阿飞心情就好似锦鲤跃上南天门，到处都彩云朵朵，香风飘飘。仲高兴过人哋金榜题名时，洞房花烛夜。等咗几日，阿飞细心打扮得光鲜企理去花园酒店人事部面试。面试由酒店洗衣部主管亲自面见，主管英文名叫：罗杰。30岁唔到年纪，中等身材，表情严肃面目威严。但言谈询问间话语亲切，唔似外间传闻外资五星酒店职员一副高抖傲慢神态。阿飞顺利通过面试，当日下午按要求到中山二路中山医院接受体检，如无重大疾病，10月8号正式返酒店报到开工，试用期工资接近有300 文，系商店嘅二倍有多。“先槽定返多啲钱，到时学车要用度。”阿飞打定主意：几辛苦都先捱过三个月试用期。听讲老道都终于等到实习机会，要开车上路，哩个消息更令人鼓舞。
另一边，自从睇完吕方演唱会，好长一段时间无人嚟光明路招惹开赌。主要系好多个都有女朋友，进入到人生另一阶段。听讲连华仔都有动静，街坊传闻大头民不忘旧金主，身边嘅大妈有更高质素嘅资源释放。阿荣个老窦哩年同样分到河南同福路新宿舍，国庆节放假大家就约到佢新屋打麻雀过节。阿飞未开工身无分文想挂免战牌，但阿荣同阿飞系佢哋嘅杨达黄俊英，过节唔俾佢两个嘥下边有气氛。荷包蛋话借佢50文，辞差话佢又借50文。节日晚会就登台亮相：
“变态华切纸铺有鬼好多嘢做咩，成日喺门口挨挨倗倗，专搵老窦笨。”阿飞嘥华仔。
“你又咪行行企企，食饭几味。”阿荣专同佢唱对台。
“咁我又无荷包蛋咁衰，食饭抹开只髀，开口叼人工仔老味。”阿飞接上对白。
“咁你咪睇到佢上有毛，下有毛，中间有个水蜜桃？”阿荣开始入戏。
“系啊，你都见？有大窿，有细窿，中间一个红吊钟啊嘛。”
“你两个柒头都唔使要面，唔怕人睇少，又唔怕被人叼。”华仔忍唔住反击啦。
大家笑到肚痛，节日进入高潮。 阿飞今时唔同往阵，人逢喜事精神旺，气势如虹，如猛虎出林，蛟龙入海，当晚奋起神威同大家大战三百个回合，还清嗮借款100文，仲袋咗50文返屋企。
今年国庆节有奥运会赛事，全国人民关心，共同聚焦我哋自己运动员夺金数目。点知今届奥运中国队成绩好唔理想，只系攞到5块金牌。但有两个美国运动员却留低俾阿飞好深刻印象：顽强嘅短跑女神格里菲斯乔伊娜，身材健美嘅泳将比昂迪。“人哋美国咁多有型嘅运动员，起码喺运动方面真唔系一只纸老虎。”阿飞惗。
网友评论