1988年将要过年。阿飞用一整日嚟清理屋企卫生，洗衫抹地。今年除夕聚会唔喺阿飞屋企过，因为荷包蛋河南间新屋收咗楼。阿飞觉得今年嘅除夕系多年嚟最美丽嘅一天，冬日晴朗，碧空如洗，天地好似同人间一样搞过卫生，满眼都系干洁明净。金桔，银柳，吊钟，桃花，鸡冠花，大黄菊应节尽情盛放，一街春色无边。
团年夜饭阿飞老窦简单做咗姜葱白切鸡，干炒鱿鱼菜心，发菜浮皮羹三个菜。虽然冷清，但阿飞几中意清淡嘅家庭气氛，好酒好餸，三仔爷唔使客气，烧注香拜拜过世嘅老母后就开饭，一家人食得津津有味。
饭后首先系尤榄同条女拍拖嚟，跟住华仔，阿荣陆续到，嘈住要开台玩锄大弟。阿飞怕佢哋玩开唔愿走去讲好嘅新屋，就岔开话题问：“唔知荷包蛋屋企食完团年饭未？”阿荣唔理佢哩一套，恃住同阿飞个老窦熟络，开得玩笑。扐出啤牌哗啦摊开喺枱面，哩下阿飞无计，只好就范。锄咗一阵，好耐无见嘅街坊旧同学大队长上到屋嚟邀请大家去跳舞。阿荣鼓足劲头要趁过年大杀四方，以报全年多次大败之仇。见阿飞有人约就冷言冷语同华仔单单打打，讲到大队长感到尴尬，只好告辞。接住荷包蛋同埋大头民个表妹介绍嘅女朋友隆重登场，带住上到阿飞屋企嚟叫，大家即刻收档去佢新屋。落到门口撞正韦明，就一齐过六甫水脚揾阿唐。阿唐着住喺西湖路灯光夜市买嘅名贵麻料西装，新嘅全棉恤衫打底。英俊潇洒，风流倜傥，睇落确实风采无人能及，俾人好强烈嘅过年感觉。阿唐知道自己靓仔，担心初五同亲戚做伴郎抢嗮新郎镜会唔好意思。阿飞讲：“咁有咩办法啧，你搞到自己成张挂历封面咁。”
一路上阿飞同阿唐斗嘴，过咗人民桥成班人就到咗荷包蛋工业大道新屋。入到屋佢哋个个好似上瘾赌徒，未坐低就企住赌起嚟。不过，喺新屋唔赌钱都无咩娱乐，哩度乜都无，啱装修完净系得台凳两样，斋得个坐。平时玩嘅差唔多都到齐，大威要陪荷包蛋新女朋友介绍嘅女朋友过12点先得闲。大家同佢约好烧完过年炮仗就转去佢屋企玩通宵。将近12点，荷包蛋要返光明路旧屋档口烧炮仗，同条女先走，留低大家喺新屋玩，阿飞同阿唐孖份赢到兴起。踏正零时零分，广州城刹那间万炮齐鸣，地动山摇，大家都知道，过年啦！过年炮仗烧响完过咗好耐都无人愿走，直到辞差过嚟催，原嚟佢早去过大威屋企嗰边，一行人立即起程去换个阵地，临走清点一下，阿飞同阿唐赢咗40文。
喺大威屋企，大家食佢妈妈煲嘅莲子百合糖水，开两档锄大弟。成班男女十几人开开心心，说说笑笑，打打闹闹，欢欢喜喜好快就天光，到咗大年初一。大威喺屋企最细，上面仲有哥有家姐。今次系为咗女朋友见屋企人而喺自己屋企过年，阿飞却乐得今年唔使搞卫生，年年都搞到老窦过年无觉好瞓，佢内心都几唔安落。韦明天近亮时已经干塘，仲欠华仔50文，据说总共输咗150文，创落自玩锄大弟以来单场输钱最多记录，块面黑到浓，挞低喺沙发度透大气，好似经历咗一场马拉松大赛。
初一早上，一行十二人分三部的士，去流花宾馆饮茶，由于过年多人到不得了，只开得两张细枱。荷包蛋，大威，尤榄同佢哋啲女朋友一张，另一张全部王老五：阿飞，阿唐，华仔，辞差，阿荣，韦明。赢钱嘅有阿飞，阿唐，大威，华仔。输钱嘅依次系阿荣，尤榄，辞差。韦明就唔使讲啦，由于口数唔对大家又喺酒楼嘈吵一轮。唔管点样，睇下韦明阵黑阵青嘅面部表情，大家就送佢个外号“一百五”。饮茶间，商量起去中山温泉玩，几经反复央求，除韦明，尤榄同女朋友三人无钱唔去，其他九人都去，决定由大威去买票。大家打的士返各自屋企，散嗮。
阿飞返到屋企瞓足一日，佢最中意通宵之后立即瞓着觉啯份快感。一觉醒嚟已经系晚上六点钟，食饭睇电视睇报纸睇新闻。到八点钟，大威，辞差喺门口叫佢，落得到去荷包蛋亦喺档口行到嚟。就一齐去对面切纸铺华仔屋企拜年，然后又到阿唐屋企拜年。之后返到荷包蛋档口，见到佢同屋楼上住志伟嘅朋友，叫“二世祖”。因为佢有一次实牙实齿话要扐盒叫《二世祖》嘅咸带嚟俾大家睇，点知到家阵都无下文。
“开台锄大弟。”唔知边个哎一声。
“5毫纸一只。”唔知又边个搞风搞雨。阿飞恃住同华仔孖份输起嚟不过2毫5分，点知一开锣马上倒水咁输，未停过输到半夜已经破咗韦明150文嘅记录，下半夜阿飞抖擞精神，施展浑身解数勉勉强强止住连输嘅势头，无奈时间一点一滴过去，天光大白都系回天乏力。年初二一大早，同华仔两人清点下，惨咯，齐头输咗200文。大家又打车去流花宾馆饮茶，席间，从嚟好少一铺输过百文以上嘅阿飞失神咁自言自语一句：“无啦，无办法。”被阿唐执住话柄嚟笑：“使乜咁睇唔开啊，你次次多数都系赢嘅，今次输锅金嘅都要啦。”佢同大威夹份啱好赢咗阿飞华仔啯份200文，二世祖赢咗180，荷包蛋同辞差正好系苦主。返嚟喺的士里面，阿飞同华仔，阿唐讲：“噙晚嘅牌我啲打啤技术发挥到极致，确实输得心服口服，我先至讲无啦无办法，哩句话系咁意思。”华仔一手推落佢度：“输都输咗喇，仲解释咁多做咩，解释即系掩饰。”
阿飞返到屋企瞓到中午1点钟，同细佬去舅父屋企同婆婆拜年，四舅父两公婆都喺度，就同埋啲表哥添一齐食开年饭。返到屋企又瞓到晚上7点，同华仔去荷包蛋档口睇港产片录像带。大威嚟到，讲已经买好听日中午11点3个字去中山温泉嘅车票。二世祖听见声从楼上志伟度过嚟，荷包蛋又叫开片打牌，大伙儿见荷包蛋老窦喺度专注睇录像带，无人敢胆打，加上已经玩咗好多晚，听日要去中山旅行都想早瞓，就各自散去。
网友评论