10月5日，阿飞休假后到一德路总公司三楼报到正式上课。全公司好多年轻人嚟，除小部分同荔湾区分公司，其他大多数都喺市内各区分公司嘅店员。落座之后，坐喺前排一个肥女人转个身，对住阿飞讲：“成间课室最靓仔你啦，靓到成个女仔咁。”佢叫阿珠，都系荔湾分公司，阿飞同佢喺向阳路商店做过工友。从课程表嚟睇，科目都几多，有七，八门，而且大多数都喺枯燥乏味嘅抽象理论课：经济学，顾客心理学，商业法律，等等。阿飞中意睇小说唔中意读书，收到发嚟嘅课本觉得头疼。离开日日返工嘅商店，重新返翻课堂有啲未适应，开头几日会情不自禁想起英姐，特别中午打饭嘅时候，喺店里面从嚟唔使佢做，宜家先至发现身边有个人一直无微不至咁关心自己，佢惗咗好多好多。
7号系中秋节，6号晚阿唐陪咗几晚女朋友，终于甩身过嚟同阿飞，阿荣，华仔，大威买雪梨苹果香蕉水果，去医院探卤水蛋。荷包蛋同个大嫂都喺齐度，手术之后卤水蛋恢复好快，精神唔错。卤水蛋讲：“啯晚唔该嗮你哋，我知啯晚唔穿过二日都穿咖啦。”
阿唐问：“咁宜家系做咗咩手术？”
大嫂就解析：“咪将溃烂穿窿啯度切咗啰。”
阿飞问：“咁第日有咩手尾咖？”
荷包蛋，大威同时叼佢：“叼你啦，咁都唔识，切咗半个胃咪细咗咯。”
阿飞仲系好茫然：“咁即系点啊？”
大嫂笑啦：“以后咪要小食多餐啰。”
一大班人讲笑一阵，要卤水蛋多啲休息，以后少啲同大头民饮酒。个个都顺便叼大头民：“嗰条友饮酒一饮开就无性咖。”
大家返到工人俱乐部对面德记士多饮啤酒汽水，阿唐好想同大家玩“锄大弟”。哩个时候华仔先发现跌咗60文，面青青咁周围揾，又返上阿飞屋企揾，阿飞个细佬话佢哋出门上的士之后，见到有人喺地上执钱。华仔份人有好嘢就收埋收埋，孤寒难舍，冤枉甘心，宁益贼佬都唔益外母。大家都笑华仔上次举重，哩啲系报应嚟，早知就益大家班老友。
中秋节晚，九个人济济一堂终于大团聚，喺阿飞天棚度赏月贺中秋。开台啤牌大战，阿飞先先赢，赢到开嗮巷就帮“弱材铺”华仔夹份打几铺，等佢赢返啲唔好咁快又干塘走人，咁就无咁热闹。点知下半夜竟然倒输，输到囊空如洗，自己举重收场。未天光就上床瞓，其他人一直杀到天见红才散去。阿飞瞓落床上又辗转反侧，夜不成寐唔忿气。一阵怨自己心慈手软，一阵又觉得自己太重感情，白落得周身骨痛。
瞓足一日，晚上醒嚟，荷包蛋同大头民嚟到，揾埋华仔去广州酒家饮夜茶，佢四个都系饮得酒之人，一晚落嚟唔觉意饮咗白兰地，九江双蒸，珠江啤酒二十几支、、、、、、
荷包蛋老窦喺向阳路尾分到单位宿舍，卤水蛋仲住紧院，日头档口生意兴隆，只好利用晚上叫齐大家帮手装修。阿飞熬咗两晚凌晨，都系打下杂，递下工具，装裱房屋墙纸之类。第早玩杠铃健身，支撑到最后时，心里面有讲唔出嘅难受，四肢百骸酸软乏力，全身不停出虚汗，面色蜡黄发青，身上嘅肌肉一条条都好似喺度抽搐。阿飞感受到全身将要发高烧，内心净系想作呕，大口大口反胃干吐，成个人有种即将要休克过去嘅感觉。大脑仲系清醒嘅，瞓响床上好耐好耐，先觉得有啖气系肚脐慢慢咁暖暖流过血管，全身又开始恢复骚动，之后全部回复原状。佢切身体会咗一次虚脱全过程嘅难受，瞬间嘅痛苦久久留喺心头。回光返照之后接住肚疴肚泻，到傍晚已经疴黄水，只好漏液去惠福路省人民医院睇急诊，打针吃药辛苦咗几日，最后攞齐药费单返商店搵出纳杨姨报销。
读书两个星期之后，阿飞发觉课程原来唔喺佢惗咁难，都系啲初级基础商业知识。渐渐讲得埋嘅工友开始打成一遍，同龄人臭味相投，上课讲笑话，放学就约打麻将，读书就开心咯。出嚟社会工作多年，宜家脱产学习，工资照攞，人生最好就咁一直读落去。夜晚流连荷包蛋档口搏杀，日夜通宵达旦咁玩，好在喺课堂有觉瞓翻，精神唔至于太疲累。试过二晚都无返屋企瞓，搞到佢老窦瞓醒唔见仔，过嚟拍荷包蛋档口门揾，担心到死。老窦对阿飞今次读书寄予好大期望，希望个仔中意睇书嘅优点喺哩度有所作为，但阿飞喺荷包蛋身上却睇到国营职工毫无出头。
无人过嚟光明路，大头民又无钱赌，阿唐露水情缘红颜知己多，尤榄嘅学识只会锄大弟唔识打麻雀，锄大弟又要多人玩先热闹。荷包蛋，华仔，阿飞，尤榄就去向阳路口大排档宵夜。
“大头民被表妹飞咗啦。”哩个消息太惊人，华仔宵夜透露出嚟犹如参考消息咁令人关注。
“你又知真系嗝？”荷包蛋中意窒人，但唔会质疑阿庆，大威两个。
“我唔知？”参考消息点可以受到质疑，华仔知少少就扮代表：“我去磨刀嗰度就喺表妹屋企对面，我有乜理由唔知？”
“佢两个都拍拖好多年。”尤榄讲。
哩几年见亲佢两个都好似孖公仔形影不离。大头民同阿飞虽然系结拜大佬，自从拖上表妹除咗嚟借钱就基本好少来往。阿飞满口忠义，开声撩事斗非，同大头民成日讲女人讲跳舞，人生观念已经离天万丈，南辕北辙。“咩事被飞啧？”阿飞问嘅完全同佢无关。
“迟早啦被人飞！大头民心头高，捞又捞唔掂，孭到成身债，日日游手好闲周围借钱。”华仔继续报道。
“一早我话过佢嗝，出去捞偏门，成日去舞厅沟女，留低表妹喺度无所事事。”荷包蛋其实早知道，佢故意刺激华仔，想氹佢爆多啲料。
“表妹屋企介绍咗佢去仓边路富豪酒店做服务员，识咗个厨房仔，咪飞起大头民啰。”华仔补充到。
“酒楼好复杂。”阿飞落定性。
阿飞觉得多年以前佢两人相识，表妹少女情怀，只知到爱情浪漫。宜家心智成熟开始识惗，跟住大头民无好结局，哩啲明眼人都见，并唔一定因为个厨房仔出现。过后每日听华仔磨完切纸刀返嚟光明路八卦，表妹父母早强烈反对两人发展，而且嗰个奀撩鬼命嘅所谓表妹，阿飞第一次见佢就认为同大头民一担担，一路货色阿崩唔好话阿赖，而且哩个几乎系所有人嘅共识。大头民失恋成咗光明路大事件。无钱，失业，周身债，相恋五年朝夕相对恋人离开，打击实在太大。到咗茶饭不思嘅地步，每日斋饮酒，醉咗就瞓喺荷包蛋档口唱冯伟堂旧情歌，唱到声泪俱下，哀哀低鸣 。大家聚赌不成，怕嗮见佢衰样，个多礼拜无人过嚟开台。阿飞心惗好彩自己无拍拖，失恋太可怕，女人太善变。
参考消息嘅后续报道，大头民日夜到表妹屋企骚扰打闹，同表妹屋企人发生激烈冲突。后来知道华仔日夜唱衰大头民系因为表妹介绍女仔俾荷包蛋成功，宜家甜蜜来往当中，而佢自己啲地水已经落咗，底牌却无得睇，正式街砖3都无只。表妹飞起大头民等于庄家割禾青，所以大发牢骚。 荷包蛋因为表妹射女有功，叫咗大头民去档口做住先，等佢有翻啲收入。
网友评论